VIKEKE, 26 Marsu 2026 (TATOLI)—Servisu Ministériu Agrikultura Peska, Pekuária no Floresta (SMAPPF) liuhusi Diresaun Floresta Munisípiu Vikeke servisu hamutuk ho Adventist Development and Relief Agency (ADRA) kuda ai-oan 2000 hodi konserva rai halai no bee-matan sira iha Aldeia Loa, Suku Uma-Ki’ik, Postu Vikeke Vila, Kinta ne’e.
Iha lansamentu kuda ai-oan ne’e, reprezentante Sekretáriu Estadu Floresta (SEF), Raimundo Mau, esplika Diresaun Floresta hamutuk ho ADRA mobiliza autoridade no komunidade selebra Loron Mundiál Floresta ba datoluk, nune’e kuda ai-horis ba área sira-ne’ebé fó risku ba komunidade.
“Tan ne’e, ita hakarak kuda hikas ai-oan bá área Aldeia Loa, tanba rai ne’e ita haree rai monu. Ho ida-ne’e ita kuda ai-oan atu re-floresta ba rai sira-ne’e,” Raimundo esplika.
Nia hateten bá-oin floresta sei kontinua re-floresta ba rai-molik sira hodi salva rai, salva bee no futura jerasaun nia moris liuhusi restaura ambiente.
“Tanba ne’e, Governu nafatin fó prioridade ba área floresta hodi kontinua restaura floresta no proteje floresta sira. Nune’e mós sei envolve ita-nia komunidade hodi kuida floresta no proteje,” nia hato’o.
Nia relata programa konservasaun kuda ai-oan ne’e hetan apoia rede hale’u husi ADRA Inglaterra liuhusi ADRA Timor-Leste no apoia ai-oan husi Floresta Munisípiu Vikeke.
Kona-ba ai-oan ne’ebé kuda ho tipu oioin mak hanesan ai-kakeu, ai-saria no ai-oan sira seluk ho kuantidade 2000, kuda iha área rai ektare rua.
Iha fatin hanesan, Sekretáriu Munisípiu Vikeke, Acásio de Sousa, husu komunidade atu kuida ai-oan sira-ne’ebé parte floresta no ADRA kuda tenke tau-matan no labele husik balada sira estraga ai-oan hirak-ne’e.
“Ha’u hato’o agradese ba parseiru ADRA tanba apoia ona komunidade kuda ai-oan ba konservasaun rai no bee. Tanba ne’e, ha’u solisita komunidade tenke tau-matan ba ai-oan sira. Labele husik animál sira estraga ai-oan,” nia tenik.
Iha biban hanesan, Reprezentante ADRA Inglaterra, Brendon Irvane, haktuir objetivu husi kuda ai-oan atu halo protesaun ba rai halai no ai ne’ebé bele konserva bee.
“Ba futuru ADRA kontinua koopera ho MAPPF apoia komunidade kuda ai atu aumenta kadeia valór hodi fó rendimentu ba komunidade,” nia subliña.
Enkuantu, Xefe Suku Uma-Ki’ik, Claudino Amaral, hato’o agradese ba ADRA tanba apoia tan komunidade Uma-Ki’ik hodi kuda ai-oan proteje rai no konserva bee.
“Nu’udár autoridade kontinua koopera ho parte parseiru sira, hodi halo netik buat ruma ba ita-nia komunidade,” nia tenik.
Partisipa kuda ai-oan ne’e kompostu husi diretór servisu munisipál, autoridade lokál, veteranu, polísia eskuadra Vikeke Vila, estudante no komunidade Suku Uma-Ki’ik.
Jornalista: Vitorino Lopes da Costa
Editór: Xisto Freitas da Piedade
