Abríl 2026, atleta timoroan sei partisipa ASEAN Beach Games iha Xina
DILI, 27 Marsu 2026 (TATOLI)–Sekretariu Jerál Komité Olímpiku Nasionál Timor-Leste (CONTL-sigla portugés), Laurentino Guterres, informa jogu internasionál hamutuk haat (4) mak rezista ona no iha Abríl ne’e sei haruka atleta timoroan sei partisipa ASEAN Beach Games iha Xina.
“Ba tinan ida-ne’e ita iha eventu internasionál haat, primeiru mak ita iha ASEAN Beach Games ne’ebé sei realiza iha nasaun Xina iha fulan-Abríl, eventu ne’e ita haruka modalidade rua, Voleiból Praia no Atletizmu mak sei ba ktuir kompetisaun ne’e,” Laurentino hateten ba Agência TATOLI iha edifisiu CONTL, ohin.
Nia dehan, eventu daruak nian mak ASEAN Games ne’ebé sei realiza iha nasaun Japaun iha fulan-Setembru tinan ida-ne’e, no konfirmadu sei haruka atleta timoroan husi modalidade oioin ba kompete.
“Asian Games nian sei hala’o iha Japaun, ida-ne’e ita sei haruka atleta númeru boot uitoan ba kompete, ne’e tuir proposta ne’ebé ita haruka ba Governu maibé Governu fó prioridade ba de’it modalidade lima (5) hanesan atletizmu, karate-do, taekwondo, boxe no futeból. Maibé iha modalidade balun sei selu rasik ne’ebé hetan apoia husi sira-nia federasaun internasionál sira mós sei ba partisipa hotu, modalidade sia (9) hanesan natasaun, halterfelizmu no seluk tan. Entaun, Governu selu modalidade lima no modalidade lima selu rasik, hamutuk modalidade 14 mak sei ba kompeteiha jogu ASIAN Games ne’e,” nia hateten.
Nia hatutan, eventu datolu mak Yout Olimpic Games ne’ebé sei realiza iha nasaun Senegál Áfrika iha fulan-Outubru 2026, Timor-Leste sei partisipa modalidade rua (2) hanesan atletizmu sei reprezenta atleta na’in-ida (1), natasaun atleta na’in-rua (2) tuir pedidu ne’ebé haruka husi Komite Olímpiku Internasionál.
Enkuantu eventu dahaat nian ne’ebé CONTL simu ona konvite mak Asian Indor and Martial Art Games 2026 ne’ebé sei realiza iha Arab Saude iha fulan-Dezembru tinan ne’e. Tanba ne’e Timor-Leste liuhusi CONTL tenta hela atu haruka modalidade haat ka lima ba kompete maibé seidauk define modalidade ne’ebé atu ba tuir kompetisaun ne’e.
Jornalista : Hortencio Sanchez
Editór : Cancio Ximenes
