DILI, 27 Marsu 2026 (TATOLI)—Inspetora Autoridade Inspesaun Fiskalizasaun Atividade Ekonómika Sanitária no Alimentár (AIFAESA), sesta ne’e, divulga informasaun ba Autoridade Postu Adminsitartivu sira iha Munisípiu Dili kona-ba koima ka sansaun ba operadór ekonómiku sira iha Dili laran.
“Ohin, AIFAESA divulga informasaun ba Autoridade Munisípiu Dili no estrutura tomak iha postu administrativu lima kona-ba AIFAESA nia kna’ar ne’ebé mak liga ho koima no sansaun ne’ebé mak operadór ekonomiku sira la prienxe, sira tenke hetan konsikuénsia husi sira-nia iregulariddade ne’ebé mak la tau loloos. Ida-ne’e mak ohin ami hato’o ba sira,” Inspetora Jerál AIFAESA, Odete da Silva Viegas, hateten ba jornalista sira iha edifisiu AIFAESA, Matadoru.
Nia esplika, ida-ne’e planu atividade 2026 nian ne’ebé AIFAESA hahú uluk iha Munisípiu Dili depois ba trimestre daruak mak AIFAESA divulgasaun informsaun sira-ne’e ba munisipiu sira seluk.
“Fó hanoin nafatin ba autoridade lokál sira tanba kuaze operadór ekonomiku sira ne’e iha area ida idak nian iha postu administrativu lima kuaze ita nia operador ekonómiku sira-ne’e iha hotu fatin sira-ne’e. Agora, na’in ba munisípiu Dili mak Prezidente Munisípiu Dili ka Ministériu Administrasaun Estatál. Tanba ne’e mak enkontru ida-ne’e importante tebes atu fahe ka hatutan informasaun kna’ar AIFAESA nian ba sira, atu nune’e informasaun ne’ebé mak ohin ami divulga ba autoridade lokál sira atu ami bele hetan hanoin ida hanesan. Nune’e, banhira iha kritika ruma ami prontu rona no bele sai rekomendasaun ba futuru,” nia informa.
Iha fatin hanesan, Reprezentante Autoridade Munisípiu Dili, Filomeno Maria da Silva, hateten enkontru ne’e hanesan regulamentu ne’ebé mak durante ne’e AIFAESA hala’o, nune’e autoridade lokál sira hatene hodi sira bele halo tuir iha komunidade nia leet.
“Autoridade Munisípiu Dili apresia ba servisu AIFAESA tanba durante ne’e halo kontrolu ba aihan sira tanba objetivu ikus mak moris diak ba ita-nia povu ne’ebé mak konsumu hahan sira iha merkadu hofi bele fó saude di’ak ba sira,” nia dehan.
Jornalista : Felicidade Ximenes
Editór : Cancio Ximenes
