BAUKAU, 27 Marsu 2026 (TATOLI)–Autoridade lokál husu Governu sentrál fó prioridade ba kondisaun estrada Diresaun Postu Administrativu Baguia ba Uatukarbau, Munisípiu Vikeke tanba kondisaun grave.
Xefe Suku Osso-Huna, Paulo dos Reis Piedade, esplika estrada diresaun Postu Baguia husi Suku Alawa Kraik bá Afaloikai to’o Uatukarbau kondisaun atuál kategoriza grave, tan ne’e presiza hetan atensaun tanba difikulta movimentasaun transporte iha área referida.
“Ami sempre hato’o prekupasaun maibé pedidu sira-ne’e to’o atuál seidauk hetan serteja. Hau husu bele karik aselera ami-nia estrada,” Xefe Suku Osso-Huna hateten iha Salaun Apuramentu Administrasaun Munisipál Vila Nova, Baukau, Sesta ne’e.
Paulo Piedade relata estrada diresaun referida purvolta kilómetru sanulu-resin durante tinan-barak laiha atensaun ne’ebé difikulta ba komunidade husi suku haat Postu Baguia kompostu husi Alawa Kraik, Osso-Huna, Haekoni no Afaloikai atu transporta produtu bá merkadu iha Vila.
Aleinde ne’e, Paulo konsidera bainhira kondisaun estrada di’ak sei fó benefísiu ekonomia ba komunidade tanba área referida pontesiál ba setór turizmu tanba fasilita turista asesu ba foho Matebian, abrigu rezisténsia no bele konesaun entre Munisípiu Baukau, Vikeke no Lautein.
“Kondisaun grave liuliu tempu udan entaun difikulta transporte públiku halo movimentu tanba rai namdoras no kondutór lakohi foti risku,” Paulo Piedade akresenta.
Líder Osso-Huna ne’e salienta estrada diresaun Baguia bá Uatukarbau hasoru mota rua hanesan Basarwai no Rudoho’o ne’ebé difísil atu ultrapasa bainhira mota tun nune’e presiza konstrui ponte no pasadeira.
Entretantu, suku haat iha Postu Baguia totál populasaun hamutuk 6.851 kompostu husi Suku Afaloikai ho populasaun hamutuk 1.639, Alawa Kraik 1.934, Haekoni 2.807 no Osso-Huna hamutuk populasaun 894.
Jornalista: Natalino Belo
Editór: Xisto Freitas da Piedade
