DILI, 27 Marsu 2026 (TATOLI) – Parlamentu Nasionál (PN) louva Komisária Asistente, Natercia Eufrásia Martins, nu’udar feto dahuluk nde’ebé asume kargu nu’udar Segunda Komandante Jerál Polísia Nasionál Timor-Leste (PNTL).
“Parabens bá ha’u-nia feto maluk. Komandante Natércia ne’ebé agora hetan promosaun ba iha Komisária PNTL nian. Ida-ne’e marka istória foun iha Timor-Leste depois ita ukun-an Primeira vez PNTL fó oportunidade ba feto pontesiál ne’ebé iha kapasidade hodi asume pozisaun ne’e”, Prezidente Komisaun F ne’ebé trata Asuntu Saúde, Igualdade Jéneru no Inkluzaun Sosiál, Maria Gorumali Barreto, hato’o iha ámbitu komemorasaun loron aniversáriu PNTL ba da-26 no serimónia pose ba lideransa másima instituisaun nian iha Palásiu Governu, ohin.
Biban ne’e nia husu ba Komandu no Ministériu Interiór atu tau atensaun mós ba promosaun ba feto sira seluk iha instituisaun hodi garante igualdade, tanba nia akompaña iha mídia sosiál katak promosaun iha PNTL nian iha preokupasaun balun husi feto maluk balun maski Komisaun seidauk simu keixa ruma.
Tuir nia, bainhira feto ida brani atu ko’alia sai buat ne’ebé la presiza publika no di’ak liu bele rezolve internamente, ne’e signifika katak nia hatene situasaun sira ne’e hotu. Maibé, tanba nia seidauk prontu atu ko’alia, nia hili to’o tempu ida ko’alia sai automátika ba públiku hodi hatene.
“Ida-ne’e ha’u-nia observasaun. Ba komandante Julia Gama ninia intervensaun ne’ebé nia ko’alia durante ne’e, se nia konfronta internál iha PNTL mak to’o ikus nia la hetan promosaun, hanoin situasaun ne’e presiza hadi’a”, nia dehan.
Tuir deputada, instituisaun PNTL ne’e hothotu ninia esperansa bainhira ko’alia kona-ba seguransa ne’e iha sira-nia liman, maibé sira rasik halo situasaun ida-ne’e tenke foti medida rezolve, nune’e hahalok sira ne’e labele mosu tan iha instituisaun.
Segundu Komandante Jerál Polísia Nasionál Timor-Leste (PNTL), Komisária Asistente Natercia Eufrásia Soares Martins, agradese ba Governu tanba bele fó fiar ba nia nu’udar feto dahuluk lidera instituisaun seguransa ne’e.
Antes ne’e, Komisária Asistente Natércia Martins apresia ba konfiansa husi Governu ba nia nu’udar feto dahuluk hodi lidera PNTL. Nia dehan kargu ne’e tenke haree hanesan responsabilidade no konfiansa ida.
Lembra katak, Governu liuhusi reuniaun Konsellu Ministru iha 25 Marsu nomeia Komisáriu Asistente Afonso dos Santos, nu’udar Komandante Jerál PNTL no Komisária Asistente, Natércia Eufrásia Martins, hanesan Segunda Komandante Jerál PNTL ba mandatu tinan-tolu.
Notísia relevante: https://tatoli.tl/2026/03/25/governu-nomea-komisariu-asistente-afonso-no-natercia-lidera-pntl/
Jornalista: Nelson de Sousa
Editora: Maria Auxiliadora
