DILI, 28 Marsu 2026 (TATOLI)—Prezidente Repúbliika, José Ramos-Horta, sábadu ne’e, ofisialmente lansa aviaun Aero Dili voo dahuluk Dili-Malázia iha Aeroportu Internasionál Prezidente Nicolau Lobato, Komoro, Dili.
Notísia Relevante: MNEK diskute planu loke voo komersiál Malázia-Dili
Lansamentu ne’e Prezidente Repúblika, José Ramos-Horta, akompañadu husi Vise-Primeiru-Ministru no Ministru Asuntu Sosiál, Mariano Assanami Sabino, Ministru Negósiu Estranjeiru no Kooperasaun, Bendito Freitas, Embaixadór Malázia iha Timor Leste, Amarjit Sarjit Singh, Ministru Transporte no Komunikasaun, Miguel Manetelo, inklui entidade sira seluk iha Aerportu Internasional Nicolau Lobato.
“Ha’u sempre apoiu maka’as timoroan sira-nia inisiativa ne’ebé mak iha liuliu setór ekonómiku nian,” Xefe Estadu ne’e hateten iha ámbitu lansamentu aviaun voo dahuluk Aero Dili ba Kuala Lumpur, iha Sala VIP Aeroportu Komoro.
Nia esplika, kustu aviasaun durante ne’e sa’e tanba halo operasaun dook tanba halo manutesnaun durante operasaun ne’e.
”Ita hotu hatene katak avaisaun ne’e nia kustu sa’e, tanba halo operasaun todan tebes tanba bainhira iha falla tenke halo manutensaun. Tanba osan ladun mai iha billete pasajeiru sira maibé konetividade mak importante tebes,” Xefe Estadu ne’e dehan.
Iha fatin hanesan, Embaixadór Malázia iha Timor Leste, Amarjit Sarjit Singh, haato’o parabéns ba Aero Dili no Governu da-sia (IX) ne’ebé hahú halo atividade voo husi aviaun Aero Dili nian.
” Ita-boot nia kareira nasionál ba Kuala Lumpur ida-ne’e diak tebes. Agora ha’u iha tan akompañamentu voo nian atu semo tan, ami hetan ona aumentu iha númeru ema negósiu turista aumenta,” nia hateten.
Nia hatutan, voo dahuluk ba Malázia iha 2026 ne’e nu’udar esforsu hodi promove, nune’e Malázia hato’o obrigadu tanba halo duni ho di’ak tebes ne’ebe apoiu forte husi Governu, tanba agora TL adere ba ASEAN.
Ministru Transporte no Komunikasaun, Miguel Manetelo, hateten inisiativa ida-ne’e importante tebes ba Timor Leste, tanba haluan tan TL nia konetividade ba internasionál liuliu konetividade ida-ne’ebé lidera husi empreza privadu ida timoroan nian mak Aero Dili.
“Iha fulan-Fevereiru 2025, iha fatin ida ne’e, ha’u mai hato’o intervensaun bainhira Aero Dili halo lansamentu primeiru voo ba Singapura maibé tinan ida liu tiha, ohin, iha fatin ida ne’e, asiste tan dala ida lansamentu Aero Dili nian primeiru voo ba Kuala Lumpur,” nia dehan.
Nia hateten, Governu Konstitusionál da-sia (IX) fó importánsia ba transporte nu’udar pilar importante ida iha dezenvolvimentu ekonómiku iha nasaun nian, Governu nia papel mak atu kria kondisaun ba kreximentu ekonómiku hadi’a sirkulasaun ema no sasán tuir vizaun ne’ebe hatuur ona iha planu estratéjiku tinan 2011-2030.
”Transporte aero nu’udar servisu xave ida ba movimentu ema no sasán mai ita-nia rain no ita-nia rain sai ba li’ur, nune’e tulun desenvolve indústria turístika, komérsiu no negósiu seluk. Maibé atu hetan konfiansa entre Timor-Leste no distinu rejionál no internasionál mak Governu sei esforsu atu kria kondisaun ba aumenta regulár no opsaun barak liután,” nia esplika.
Inisiativa ida-ne’e husi setór privadu nian atu espande nia konetividade maibé Governu haree katak ida-ne’e parte ida husi esforsu ida entre setór públiku no setór privadu liuliu ministériu ne’ebé mak tutela ba transporte nian.
Diretór Ezekutivu Empreza Aero Dili, Lorenço de Oliveira, hateten Aero Dili nakloke atu servisu hamutuk ho empreza internasionál Malázia nian, atu nune’e hafasil pasajeiru atu hili kondisaun sira hotu.
”Aero Dili mós halo operasaun ho Mahkota Medikal Center iha Malázia hodi fasilita maluk sira-ne’ebé presiza halo tratamentu saúde. Vontade ne’ebé ami iha mak ami simu pasiente hamutuk ho Mahkota Medikal Center, ami sei fornese servisu ne’ebe adekuadu tuir padraun,” nia dehan.
Nia haktuir, ho rota foun hein katak bele atrai liután ema barak mai vizita Timor-Leste, tantu halo negósiu no mai hanesan turista hodi fó kontinua apoiu iha arenda Asia.
Entertantu, aviaun Aero Dili voo direta dahuluk ba Malázia-Kuala Lumpur ne’e hahú iha tuku 08h00 dadeersan oras Timor-Leste, iha Aeroprotu Internasionál Prezidente Nicolau Lobato, Komoro, Dili.
Notísia Relevante: MNEK asina akordu konetividade aérea entre TL ho Malázia
Jornalista : Felicidade Ximenes
Editór : Cancio Ximenes
