MANATUTU, 29 Marsu 2026 (TATOLI)—Primeiru-Ministru, Kay Rala Xanana Gusmão, domingu ne’e, akompañadu husi membru Governu sira partisipa misa domingu ramus ka domingu paisaun hamutuk ho sarani sira iha Igreja Nossa Senhora Maria Imaculada da Conceição, Natarbora, Munisípiu Manatutu.
Tuir observasaun Tatoli iha terrenu nota katak, antes partisipa misa, Primeiru-Ministru nia prezensa ne’e halo komunidade Natarbora haksolok hosi simu delegasaun Primeiru-Ministru ho tara tais ba Primeiru-Ministru.
Primeiru-Ministru nia prezensa iha misa domingu ramus refere nu’udar atividade kontinuasaun hafoin vizita ba munisípiu Vikeke halo diálogu ho komunidade hodi haree besik serbisu munisipál husi rezultadu Avaliasaun Konidisaun Mínima Munisípiu Vikeke nian ba iha desentralizasaun administrativa no podér lokál.
Hafoin sarani sira simu Primeiru-Ministru ho nia delegasaun, Xefe Governu ne’e partisipa kedas misa domingu ramus ne’ebé prezide husi Pároku Natarbora, Eugebios Puru-Duli.
Iha nia omília, padre selebrante ne’e hateten ohin tama ona odamatan foun ida semana lulik ka hanaran semana santa, ohin ne’e festeza no selebra liturjia ne’ebé sai fonte prinsipál selebrasaun nian.
“Ita hahú husi ita-nia fatin rezidénsia refleksaun ita hamutuk ho ita-nia na’in Jesus la’o tuir Jesus tama iha liña uma kreda boot Jeruzajem nian. Lori iha ita idak-idak nian ai-sanak ka ramus sira hodi hananu no hahí haksolok no hawelok hosana liurai Davit oan ita-nia maksoin,” Amu selebrante ne’e hateten iha nia omília.
Tuir nia, iha selebrasaun serimónia domingu ramus ida ne’e nu’udar istórikamente ramus iha povu Izrael nia istória signifika símbolu vitória, nune’e uma kreda adapta istória ida-ne’e lori sarani komprende katak iha lala’ok ne’ebé Jesus hatudu sei lori vitória eterna ba ema hotu-hotu nia klamar.
“Iha tempu kuarezma ida-ne’e ita buka atu hafunu ita nia egoízmu no ita-nia pensamentu mundu nian, atu ita bele manán pensamentu Maromak nian. Ida-ne’e mak símbolu ramus ne’ebé ita nu’udar sarani kada tinan festeza no ita sempre selebra atu hatudu katak ita mós hanaran hasoru ita-nia pensamentu umanu nian no pensamentu mundu nian,” nia hateten.
Amu selebrante ne’e husu sarani sira koko atu refleta pontu importante sira husi misa domingu ramus ne’e hodi lori fila ba bukae, mak fiar metin iha Jesus tanba Jesus nu’udar Mesias.
“Ita agradese ba Maromak tanba haruka mesias ka Jesus mai iha Mundu atu salva ita husi sala. Hosana David Maromak oan ema hotu-hotu nian ida-ne’e ita manán grasa Maromak nian. Husi Jesus nia hahalok sei lori vitória ba ita. Iha tempu ida-ne’e ita-nia funu hasoru ita-nia an hodi manán salavasaun nian. Atu manán vitória mundu nian la’ós lori ita-nia forsa maibé lori ita-nia orasaun ni kbiit Maromak nian,” nia dehan.
Jornalista : Arminda Fonseca
Editór : Cancio Ximenes
