DILI, 15 Maiu 2026 (TATOLI)–Universidade Católica Timorense (UCT) hamutuk ho Ajénsia Kooperasaun Internasionál Koreia (KOICA) organiza festivál kulturál ho títulu K-Feast iha Kampus Sentrál UCT, Balide, hodi selebra amizade no promove interkámbiu kulturál entre nasaun rua ne’e.
Reitór UCT, Pe. Joel Casimiro Pinto OFM, hateten apresiasaun boot ba prezensa Embaixadór Repúblika Koreia nian iha Timor-Leste, hatudu apoiu boot ba setór edukasaun no dezenvolvimentu foin-sa’e sira iha rai laran.
“Vizita ida-ne’e la’ós de’it prezensa formál, maibé espresaun ida-ne’ebé forte husi amizade ne’ebé manas no boot entre Repúblika Koreia no Timor-Leste,” Reitór UCT dehan ba TATOLI, iha Kampus Balide, Dili, Sesta ne’e.
Nia subliña kooperasaun ho KOICA la’o ona durante tinan rua ho balun ne’ebé konsidera KOICA nu’udár parseiru vitál ne’ebé la’ós de’it fó apoiu iha infraestrutura no kapasitasaun, maibé mós ajuda harii pontu amizade liuhusi kultura.
Iha biban ne’e, reitór enkoraja estudante sira hodi aproveita eventu ne’e atu aprende buat foun husi rai-li’ur hodi haboot sira-nia vizaun, maibé nafatin mós sente orgullu ba kultura Timor nian.
“Ita fiar katak kultura mak lian universál ne’ebé liga fuan no hanoin. Maski ita iha istória no tradisaun ne’ebé lahanesan, maibé ita fahe valór sira-ne’ebé hanesan, respeitu, servisu maka’as, solidariedade no buka futuru ne’ebé di’ak ba ita hotu,” nia afirma.
Iha fatin hanesan, Embaixadór Koreia ba Timor-Leste, Ha-yeon Chan, informa loron kultura Koreia nian ne’ebé Universidade Katólika fó fatin nune’e KOICA hamutuk ho joven sira prepara iha Timor-Leste atu fahe kultura K-pop nian.
“Iha mós k-pop dance no mós KOICA prepara K-pop jogu tradisionál sira-ne’ebé mak Koreia halo. Ha’u haree katak joven Timor no Koreia nia paixaun ba arte ne’e hanesan, maibé foin mak ami halo iha fatin ne’e. Iha futuru ami hanoin atu halo mós iha fatin seluk. Tinan oin, relasaun entre Koreia ho Timor sei halo ba tinan 25 no ami halo mós eventu hanesan iha fatin ne’e,” nia dehan.
Nia dehan eventu ne’e foka liubá idaidak nia kultura no KOICA apoiu ne’e, espera katak Timor ho Koreia bele hatene liután saida mak kultura Koreia nian no Koreia mós bele hatene liután kona-ba kultura Timor nian.
Jornalista: Osória Marques
Editór: Xisto Freitas da Piedade
