VIKEKE, 06 Maiu 2026 (TATOLI)—Ministru Agrikultura, Peska, Pekuária no Floresta, Marcos da Cruz, enkoraja komunidade Suku Luka, Postu Vikeke Vila hodi hasa’e produtu lokál fornese ba programa merenda eskolár.
“Ita ko’alia kona-ba agrikultura kompostu husi hare, batar no modo ne’ebé agrikultór tenke prodús halo barak hodi fa’an ba programa merenda eskolár tanba iha menu programa referidu utiliza produtu lokál 75% no produtu importadu 25%. Tan ne’e, ha’u husu agrikultór sira hasa’e produtu lokál para agrikultór sira hetan rendimentu no hadi’a ita-nia oan sira-nia nutrisaun liuhusi produtu lokál,” Marcos hateten iha Suku Luka, Kuarta ne’e.
Governante ne’e dehan daudaun ne’e programa merenda eskolár maioria sosa produtu importasaun tanba produtu lokál sei menus.
“Ha’u enkoraja agrikultór sira iha Luka prodús foos, haki’ak manu, karau no modo sira. Ita hatene katak na’an sira-ne’ebé mai husi rai-li’ur ne’e laiha kualidade ona. Tan ne’e, ita-nia agrikultór sira tenke esforsu an prodús produtu lokál,” nia akresenta.
Nia subliña rai iha área Suku Luka poténsia tebes ba setór agrikultura hanesan kuda modo, hare no haki’ak balada sira tanba rai luan.
“Atu ita labele depende ba hahán importasaun sira hodi fornese ba ita-nia oan sira konsume. Agrikultór sira mak tenke esforsu hasa’e produsuan agríkola,” nia informa.
Jornalista: Vitorino Lopes da Costa
Editór: Xisto Freitas da Piedade
