VIKEKE, 30 Marsu 2026 (TATOLI)—Xefe Suku Builó, Postu Administrativu Ossú, Munisípiu Vikeke, Hélio Ximenes de Fernandes, husu Ministériu Saúde (MS) koloka permanente pesoál saúde sira iha Suku Builó hodi halo atendimentu ba populasaun.
“Hahú husi tinan 2023 ami prevee orsamentu Programa Nasionál Dezenvolvimentu Suku (PNDS) hodi reabilita postu saúde ba Suku Builó nian inklui konstrui rezidénsia ba pesoál saúde sira, maibé menus rekursu tanba daudaun ne’e iha Postu Saúde Builó iha de’it enfermeiru na’in-rua (2) no saúde públika na’in-ida (1). Ami laiha médiku no parteira,” Hélio hateten ba TATOLI iha resintu Autoridade Munisipiu Vikeke, Segunda ne’e.
Nia relata maski Suku Builó konstrui ona rezidénsia ba pesoál saúde sira, maibé sira la hela ne’ebá hodi halo tratamentu ba populasaun.
“Rezidénsia ba pesoál sira nian ami konstrui iha tinan 2024. Agora sai abandonadu. Pesoál sira la utiliza. Tan ne’e, ha’u husu ba Ministériu Saúde koloka pesoál saúde sira iha suku hodi hela iha suku tanba uma ba sira preparadu,” nia akresenta.
Hélio haktuir distánsia husi Suku Builó purvolta kilómetru tolu-resin hafoin to’o iha Sentru Saúde Ossú, tanba ne’e autoridade prefere MS destaka pesoál saúde hodi atende povu.
Hatán ba preokupasaun ne’e, Ministra Saúde, Élia Amaral, hateten maski profisionál saúde sira la hela iha suku, maibé Governu iha programa ida kona-ba atendimentu movel hodi atendimentu ba populasaun iha área rurál.
“Ami rekoñese ba preokupasaun sira-ne’e katak ita menus rekursu umanu. Iha tinan kotuk ita halo ona rekrutamentu ba pesoál saúde ba munisípiu hotu ho totál na’in-1.660. Ba munisípiu Vikeke ita sei koloka médiku na’in-tolu (3), enfermeiru na’in-tolu (3), parteira na’in-haat (4). Ba Suku Builó, ita halo atendimentu movel de’it,” nia subliña.
Tuir dadus, populasaun Suku Builó iha aldeia haat (4) ho totál abitante hamutuk 1.301husi uma-kain 288.
Jornalista: Vitorino Lopes da Costa
Editór: Xisto Freitas da Piedade
