BAUKAU, 30 Marsu 2026 (TATOLI)—Autoridade suku husu Governu sentrál tau-atensaun ba kondisaun estrada diresaun Suku Kaibada Makasae bá Buruma ne’ebé afeta movimentasaun transporte.
Xefe Suku Kaibada Makasae, Postu Administrativu Baukau Vila, Júlio Alegria Belo, esplika kondisaun estrada diresaun Suku Kaibada kategoria estragu ne’ebé afeta ba transporte liuliu movimentasaun komunidade bá merkadu no fasilidade saúde.
“Liuhusi Planu Dezenvolvimentu Suku (PDK) ami aprezenta ona, depende husi Governu atu deside, maibé tenki hadi’a tanba estrada ne’e kategoria estrada urbana,” Júlio Belo hateten iha ninia kna’ar fatin, Sede Suku Kaibada Makasae, Segunda ne’e.
Nia relata estrada diresaun referida kobre aldeia rua kompostu husi Data-Ua no Kai-Obilale hamutuk kilómetru tolu-resin ne’ebé koneksaun husi Suku Tirilolo to’o Buruma iha-ne’ebé tempu Indonézia sai dalan aternativu ba Postu Laga no Munisípiu Lautein.
Aleinde ne’e, aldeia rua seluk ne’ebé kategoria rurál hanesan Boru-Baha no Maulame presiza mós hetan atensaun mezmu autoridade suku sei solusiona ho orsamentu Programa Nasionál Dezenvolvimentu Suku (PNDS).
“Estrada iha-ne’e kuak no fatuk de’it ona, utiliza motór pelumenus di’ak maibé kareta difísil loos, más obrigadu tenke utiliza tanba nesesidade,” Júlio Belo akresenta.
Líder suku ne’e konsidera infraestrutura estrada nu’udar fatór determinte ba rendimentu ekonomia tanba fasilita komunidade transporta produtu ba merkadu, nune’e sai prioridade ba konsellu suku atu aprosima ho instituisaun relevante hodi buka solusaun.
Sei kanaliza bee-mos iha Aldeia Maulame
Entretantu, autoridade Suku Kaibada Makasae planeia ona sei kanaliza bee-mos liuhusi atividade regulár Programa Nasionál Dezenvolvimentu Suku (PNDS).
Xefe Suku Kaibada Makasae, Júlio Alegria Belo, haktuir reuniaun konsellu suku deside implementa atividade regulár PNDS ba Aldeia Maulame tanba komunidade iha área referida difísil asesu bee-moos durante tinan barak.
“Ho atividade regulár PNDS ami bele redús ona komunidade Maulame nia prekupasaun,” Júlio hateten iha ninia kna’ar fatin.
Nia dehan autoridade suku hamutuk ho tékniku PNDS finaliza ona levantamentu dadus hanesan kanaliza husi bee-matan Komuloli ho distánsia kilómetru haat-resin ho totál orsamentu $35.225 aloka ba fundu infraestrutura rihun $30 no kustu opersionál hamutuk $5.225.
Suku Kaibada Makasae foin dahuluk implementa PNDS hafoin administrativamemte haketak an husi Suku Kaibada nu’udár suku foun iha tinan 2025 nune’e ho kanalizasaun bee-moos bele responde ona preokupasaun husi komunidade Maulame ho totál benefisiáriu hamutuk 140 husi uma-kain 39.
Entretantu, Suku Kaibada Makasae hamutuk aldeia haat kompostu husi Data-Ua, Kai-Obilale, Boru-Baha no Maulame ho totál populasaun hamutuk 2.160 husi uma-kain 529.
Jornalista: Natalino Belo
Editór: Xisto Freitas da Piedade
