BAUKAU, 30 Marsu 2026 (TATOLI)—Projetu reabilitasaun estrada urbana pakote II iha Baukau Vila hahú iha faze alargamentu.
Enjiñeiru husi Kompañia Responsavel Vege’el Unipessoal, Lda, Frederico Rodrigues Fernandes, esplika prosesu serbisu iha terrenu atuál iha faze alargamentu no kompañia hahú serbisu iha meiadu fulan-ne’e hafoin simu karta orden servisu husi Ministériu Obra Públika (MOP).
“Ami-nia serbisu foin hala’o cleaning de’it husi rotunda mai iha servisu edukasaun nian, husi fali Tribunál to’o iha Igreja Vizão Cristã nia oin no diresaun tun mai BCNTL nian,” Frederico hateten iha Vila Nova, Baukau, Segunda ne’e.
Frederico Rodrigues relata bainhira finaliza alargamentu iha área Rotunda to’o Igreja Vizão Cristã no Tribunál to’o edifísiu servisu edukasaun, sei kontinua ke’e valeta ho totál distánsia kilómetru rua-resin.
Aleinde ne’e, etapa daruak sei kontinua ke’e valeta iha-ne’ebé prosesu referidu sei hein orientasaun husi MOP liuhusi dokumentu ofisiál ne’ebé tuir planu sei submete iha fimde fulan-ne’e.
“Agora seidauk tanba problema uitoan iha dokumentu seidauk hatama,” Frederico akresenta.
Iha fatin ketak, Koordenadór Tékniku Obra Públika Destakadu Munisipiu Baukau, Diego Cipriano Caleza, informa hafoin hetan karta orden servisu estrada pakote daruak iha faze alargamentu no seidauk autoriza ke’e valeta tanba presiza halo ajustamentu dezeñu tuir kondisaun iha terrenu nunee futuru la prejudika ba kualidade projetu.
“Dezeñu la’ós sala, maibé prezisa halo ajustamentu tuir kondisaun terrenu ne’ebé iha,” Diego Caleza hateten.
Diego tenik projetu reabilitasaun estrada urbana Baukau Vila ramata ona hala’o levantamentu dadus ba komunidade ne’ebé afetada hamutuk 55 kompostu husi pakote dahuluk uma 24 no pakote daruak 31, kompostu uma komunidade, loja no morru protesaun ne’ebé sei iha faze prosesa indemnizasaun.
Entretantu, estrada urbana iha Baukau Vila hahú lansa iha loron 06 Fevereiru 2026 ho totál kilómetru 23 iha-ne’ebé kompañia JOVA Construction Unipessoal, Lda responsabiliza pakote dahuluk ho valór orsamentu $4.735,021,55 no pakote daruak responsabiliza husi Kompañia Vage’e Unipesóal, Lda ho valór orsamentu $3.768.933,21 ho durasaun serbisu tinan-rua.
Jornalista: Natalino Belo
Editór: Xisto Freitas da Piedade
