DILI, 30 Marsu 2026 (TATOLI)–Guarda Nasionál Rhode Island, Majór Jenerál Andrew J. Chevalier, vizita Timor-Leste iha 29 Marsu—02 Abríl 2026, ho objetivu atu hametin kooperasaun bilaterál iha área defeza, asisténsia umanitária no resposta ba dezastre, iha ámbitu Parseiru Estadu nian ne’ebé asina ona iha tinan 2020.
Parseria ne’e ho objetivu atu hadi’a dezenvolvimentu profisionál, formasaun, no troka entre Guarda Nasionál Rhode Island no Forsa Defeza Falintil-Timor-Leste (F-FDTL).
Tanba ne’e, Majór Jenerál Andrew Chevalier hasoru malu ho Prezidente Repúblika, José Ramos-Horta, nu’udar parte atu aprofunda relasaun institusionál entre Timor-Leste no Estadu Unidu Amérika, iha Palásiu Prezidensiál Nicolau Lobato, bairru Pite.
Durante audiénsia ne’e ko’alia kona-ba liña prinsipál sira kooperasaun nian entre nasaun rua ne’e, nune’e mós kona-ba oportunidade foun sira ba kolaborasaun, ho foku espesiál ba reforsu kapasidade F-FDTL (Forsa Defeza Timor-Leste), hadi’a koordenasaun institusionál no hametin resposta ba emerjénsia.
Majór Jenerál Andrew Chevalier hateten, parseria entre Guarda Nasionál Rhode Island no Timor-Leste konsolida ona iha tinan hirak nia laran, hodi subliña ezisténsia relasaun istóriku ida kooperasaun nian.
“Ami iha ona parseria estatál ida ho Timor-Leste durante tinan neen resin, maibé ami-nia relasaun fila-fali ba dékada sira, antes mós independénsia, ho serbisu besik ho lideransa timoroan nian,” nia hateten hafoin ramata enkontru ho Xefe Estadu José Ramos-Horta, iha Palásiu Prezidensiál Nicolau Lobato, ohin.
Nia dehan, enkontru ho Xefe Estadu permite análize ba oportunidade sira hodi habelar kooperasaun bilaterál, la’ós de’it iha ámbitu defeza nian maibé mós iha área komplementár sira.
“Ha’u iha enkontru ida-ne’ebé produtivu tebes ho Prezidente Horta, iha ne’ebé ami ko’alia kona-ba dalan atu habelar ami-nia parseria entre estadu Rhode Island ho Timor-Leste, la’ós de’it iha área defeza nian, maibé mós iha área ekonómika no resposta ba dezastre no asisténsia umanitária,” nia dehan.
Tuir Majór-Jenerál, kooperasaun iha futuru tenke foka mós ba reforsu kapasidade sira resposta emerjénsia nian, ho atensaun partikulár ba koordenasaun entre instituisaun nasionál sira no parseiru internasionál sira, atu nune’e bele hasa’e nasaun nia reziliénsia.
Hanesan parte husi vizita ne’e, planeia mós enkontru sira ho Primeiru-Ministru, Xanana Gusmão, no ministru Defeza, kontra-almirante Donaciano Gomes, ho objetivu atu aprofunda diálogu estratéjiku no operasionál no kontinua dezenvolvimentu parseria nian.
Andrew Chevalier hato’o agradeseimentu ba povu timoroan sira-nia ospitalidade no husik hela mensajen pesoál ida.
“Ha’u hakarak agradese ba povu Timor-Leste ba maneira ne’ebé sira simu ami durante vizita ida ne’e, ha’u hato’o ksolok domingu ramus no Páskua Santa ba ema hotu,” nia hakotu.
Durante permanénsia tomak iha rai-laran, Majór-Jenerál partisipa hela iha inisiativa no atividade institusionál sira relasiona ho formasaun, interkámbiu tékniku no kapasitasaun, reforsa kompromisu konjuntu ba kooperasaun iha área estratéjiku sira.
Vizita ne’e reforsa kompromisu ne’ebé fahe entre Timor-Leste no Estadu Unidu Amérika hodi hametin kooperasaun bilaterál, hodi kontribui ba promosaun seguransa, estabilidade no reziliénsia iha rejiaun Indo-Pasífiku.
Jornalista : Hortencio Sanchez
Editór : Cancio Ximenes
