DILI, 30 Marsu 2026 (TATOLI)–Prezidente Federasaun Natasaun Timor-Leste (FNTL), Laurentino Guterres, hateten Timor-Leste liuhusi Federasaun Natasaun Timor-Leste (FNTL) sei haruka atleta natasaun na’in-rua atu partisipa Asian Games 2026 ne’ebé sei realzia iha Japaun.
“Tinan ne’e Asian Games iha Japaun, natasaun ita sei haruka atleta na’in-rua mak ba partisipa, feto ida no mane ida. Sira agora halo hela preparasaun,” Laurentino hateten ba Agência TATOLI iha edifisiu Komite Olímpiku Nasionál Timor-Leste (CONTL-sigla portugés), Dili, segunda ne’e.
Nia dehan, iha atividade ne’e oinsá atu halibur atleta sira-nia pontu antes ba kompete iha jogu Olímpiku 2028.
Iha parte seluk, nia dehan,iha fulan-Dezemebru atleta na’in-tolu (3) husi modalidade Natasaun sei ba kompete mós iha jogu World Championship (Kampionatu Mundiál) ne’ebé realiza iha nasaun Xina.
“World Championship ne’e importante tebes tanba hanesan faze ida atu halibur mós pontu ba jogu Olímpiku 2028 ne’ebé sei hala’o iha Estadu Unidu Amerika (EUA) Los Angeles,” nia dehan.
Nia esplika, atu hakat ba jogu Olímpiku, FNTL presiza atu partisipa jogu liu haat (4) iha tinan 2026 atu nune’e bele halibur pontu ne’ebé di’ak.
Husi atividade hirak ne’e, Natasaun hetan apoiu orsamentu husi Federasaun Natasaun Internasionál no FNTL buka osan rasik hodi finansia ba atividade hotu no atleta sira-nia mesesidade.
Kampionatu Nasionál
Iha tinan 2026 ne’e, FNTL planeia ona atu realiza kampionatu nasionál ba modalidade Natasaun espesifiku ba idade kiik sira.
“Ita planu hela atu hala’o kampionatu ida, ita sei hala’o iha Komponente Navál Hera, ita sei halo ba labarik tinan ualu ba kraik, ida ne’e oinsa atu prepara atleta sira ba future. Atleta lubuk ida mak durante ne’e hala’o treinamentu iha pixina sira Dili laran,” nia hateten.
Kona-ba bainhira mak realiza kampionatu ne’e, FNTL seidauk deside fulan tanba sei buka hela patrosinadór sira atu fó apoiu finansiamentu, atu nune’e bele prodús sertifikadu, medalla ba atleta manán-na’in sira.
Jornalista : Hortencio Sanchez
Editór : Cancio Ximenes
