VIKEKE, 31 Marsu 2026 (TATOLI)–Xefe Suku Karaubalu, Postu Vikeke Vila, Munisípiu Vikeke, João Pinto, husu Ministériu Edukasaun (ME) konstrui edifísiu eskola Sentru Aprendizajen no Formasaun Eskolár (CAFE-sigla portugeza) Munisípiu Vikeke nian tanba autoridade no komunidade Karaubalu oferese ona rai ba ME, maibé to’o agora seidauk konstrui.
“Ha’u hakarak hato’o preokupasaun ba eskola CAFE ne’ebé eziste tinan-sanulu (10) iha Munisípiu Vikeke, maibé to’o agora eskola referida seidauk iha edifísiu própriu ba sira hodi uza ba prosesu aprendizajen. Nune’e, iha tinan kotuk ami hamutuk ho komunidade Suku Karaubalu oferese rai gratuita ba ME para konstrui edifísiu ba eskola CAFE, maibé to’o agora seidauk konstrui,” João Pinto ba jornalista sira iha Postu Vikeke Vila, Tersa ne’e.
Tanba ne’e, autoridade komunitária ne’e husu ME konstrui ona edifísiu CAFE tanba autoridade Suku Karaubalu esforsu hetan ona rai ektare tolu (3) no oferese ona ba ME, maibé realidade seidauk implementa.
Daudaun ne’e, eskola CAFE Munisípiu Vikeke kompostu husi pré-eskolár to’o sekundáriu provizóriu utiliza edifísiu ensinu báziku sentrál (EBC-sigla portugeza) 01 Baimeta Vikeke Vila.
Iha fatin ketak, Reprezentante Koordernadór CAFE Munisípiu Vikeke, José de Carvalho, tenik daudaun ne’e saladeaula eskola CAFE limitadu tebes ba estudante sira tanba númeru estudante boot, maibé sala iha de’it 13, entaun sai dezafiu ba manorin sira.
“Durante ne’e, sala aula mak sai preokupasaun ba ami tanba sala limitada tebes. Tan ne’e, ami hakarak sujere ba ME para konstrui lalais ami-nia edifísiu eskolár, atu ami uza ba hanorin ita-nia oan sira. Kona-ba sala ne’ebé ami presiza hamutuk 28,” nia haktuir.
José relata provizoriamente profesór no estudante eskola CAFE utiliza hela sala aula eskola 01 Vikeke nian iha oras loraik, ne’ebé labele kompleta oras 40 kada semana. Tanba, sira utiliza de’it oras rua ho balun hodi hanorin estudante sira.
Tuir dadus, estudante CAFE ba anu letivu 2026 ho totál hamutuk 690.
Hatán ba preokupasaun ne’e, Ministra Edukasaun, Dulce de Jesus haktuir, kona-ba prosesu konstrusaun edifísu ba eskola CAFE, depoiz entrega rai ne’e ME presiza atribuisaun rai nian ofisialmente husi terra no propriedade ba títulu rai nian, atu ministériu kontinua ba prosedimentu tékniku sira.
“Maibé, ba eskola CAFE Munisípiu Vikeke ami rejista ona iha Sekretaria Grande Projetu. Iha tempu badak ha’u sei servisu hamutuk ho prezidente autoridade Vikeke, atu kompleta títulu rai nian, depoiz ita avansa ba servisu tékniku sira seluk,” nia hato’o.
Jornalista: Vitorino Lopes da Costa
Editór: Xisto Freitas da Piedade
