KOVALIMA, 31 Marsu 2026 (TATOLI) – Komisaun Nasionál ba Eleisaun (CNE-Sigla Portugués), hala’o Edukasaun sívika kona-ba lalaok eleisaun ba partidu polítiku sira iha munisípiu Kovalima.
Atividade edukasaun sívika ne’e ho tema: “Konsolidade Demokrásia no Integridade Eleisaun”.
“Atividade Edukasaun sívika hanesan ita atu fanun malu, oinsá ita atu halo preparasaun hodi hasoru festa domokrásia hanesan eleisaun presidensiál ne’ebé besik daudaun ona”, Komisáriu Destakadu Ainaro no Kovalima, Elvino Bonaparte do Rego hato’o liuhusi nia diskursu iha salaun AMC-Suai.
Eleisaun sei hala’o tinan lima dala ida hanesan eleisaun ba Prezidensiál, Parlamentár no eleisaun Konsellu Suku presiza atu prepara aan ho didiak.
Atividade edukasaun sívika ne’e CNE konvida partidu polítiku sira hanesan CNRT, FRETILIN, PD, KHUNTO, PLP no partidu seluk hodi akompaña lalaok eleisaun ho demokrásia no tuir sistema eleisaun inklui resensiamentu eleitorál baze dadus sistema biométriku.
Iha sorin seluk, Prezidente Autoridade Munisípiu Kovalima, Miguel Armanda Cardoso, dehan edukasaun sívika ba partidu polítiku sira importante hodi prepara hasoru festa domokrásia ne’ebé mak besik mai ona.
“Ohin loron importante ba ita atu rona informasaun nune’e ita bele prepara aan ba eleisaun,”nia dehan.
CNE nia prenzensa iha Kovalima atu partilla informasaun kona-bá lalaok eleisaun nune’e komunidade ka eleitór sira bele prepara aan hodi partisipa eleisaun.
Jornalista:Celestina Teles
Editór: Florencio Miranda Ximenes
