DILI, 31 Marsu 2026 (TATOLI)-Koordenadór Jerál Asuntu Ekonómiku, Jorge Rui de Carvalho Martins, husu ba instituisaun tuteladas sira iha Ministériu Koordenadór Asuntu Ekonómiku (MKAE) atu garante funsionamentu institusionál ho di’ak.
Tamba ne’e Koordenadór Jerál MKAE, Jorge Rui de Carvalho Martins, dehan sira realiza enkontru mensál entre instituisaun tuteladas sira hodi hatene de’it sira-nis progresu servisu dezafiu ne’ebé sira infrenta durante servisu ezekusaun atividade no orsamentu.
“Aleinde ne’e mós atu hafasil kontrolu komunikasaun entre MKAE ho ninia instituisaun tuteladas sira tamba dalabarak ema ladun komprende funsionamentu instituisaun sira ne’ebé iha MKAE nia okos”, Koordenadór MKAE relata ba jornalista sira iha edifísiu AIFAESA, ohin.
Nune’e nia dehan ho enkontru sira hanesan ne’e bele atualiza dadus ne’ebé durante ne’e kada instituisaun sira rejista iha trimetre dahuluk nian no haree efisiénsia komunikasaun iha inter governamentais, ne’ebé kontinja relata ba Ministru Koordenadór Asuntu Ekonómiku.
“Iha biban ne’e ita mós halo ona revizaun ba sira-nia gastu orsamentu ne’ebé prevee ba sira, atu nuje’e ita bele hatene sira-nia independénsia autónomu jurídiku administrativu kona-ba finansas ne’e sira ezekuta duni ho didi’ak no sein iha intervensaun polítika ne’ebé dezafia fali sira atu implementa sira-nia programa”, nia afirma.
Entretantu kona-ba sira-nia progresu iha tinan 2026 foin mak iha faze trimestre dahuluk entaunbsira sei prepara relatóriu tamba kresimentu ekonomia sa’e no kontribui kapasidade kompra iha merkadu maibé progresu iha tinan kotuk kuaze instituisaun tuteladas sira halo sira-nia servisu ho di’ak.
Iha fatin hansan tuir Inspetora Jerál AIFAESA, Odete Viegas, hateten enkontru ne’e liga liu ba mekanismu koordenasaun hodi hato’o informasaun relevante husi instituisaun ida-idak nia dezempenu servisu.
“Tamba ne’e instituisaun AIFAESA rasik durante ne’e progresu di’ak tamba iha trimestre dahuluk de’it sira kuaze halo inspesaun ba operadór ekonómiku hamutuk 2.500-resin barak liu iha kategória komérsiu no rekolla ona koina hamutuk rihun $200-resin”, Inspetora dehan.
Atividade inspesaun ne’e halo ba kategória tolu, konérsiu, indústria inklui turístiku no atividade inspesaun ne’e halo regularmente, dalaruma mós bazeia ba keixa husi komunidade, nune’e ekipa tuun kedas halo inspesaun ho mekanismu divulga informasaun, prende sasan no taka estabelesimentu.
“Nune’e dezafiu ne’ebé iha mak kona-ba laboratóriu no ida seluk maka kombustivel, orsamentu iha maibé prosesu aprovizionamentu mak tarde, tamba AIFAESA nia servisu inspesaun ne’e la’ós de’it iha sidade Dili maibé mós ba munisípiu sira hotu”, nia informa.
Enkuantu atividade ne’e hetan partisipasaun másimu husi institutu tuteladas sira hanesan IGT, IQTL, Trade Invest, IADE, CLN, I P, AIFAESA, Institutu Bambu, CNEFPE, CNFP-Bekora, INDMO, no maske balun la marka prezensa.
Jornalista: Alexandra da Costa
Editór: Cancio Ximenes
