DILI, 31 Marsu 2026 (TATOLI) – Nu’udar Embaixadór Estraordináriu no Plenipotensiáriu Indonézia ba Repúblika Demokrátika Timor-Leste, Okto Dorinus Manik, besik atu ramata nia mandate iha Embaixada Indonézia (KBRI) iha Dili hodi hala’o enkontru despedida ho jornalista sira, no husu ba mídia TL atu fó prioridade ba kualidade no profisionalizmu.
Eventu ne’ebé hala’o iha Rezidénsia Embaixadór Indonézia nian iha Tasi-ibun Kelapa sai nu’udar sinál apresiasaun ba kolaborasaun ne’ebé estabelese ona entre Embaixada Indonézia iha Dili ho mídia sira iha Timor-Leste.
Iha ambiente ne’ebé manas no amigavel, Embaixadór Okto, akompaña husi nia espoza, Flantina Silalahi, no pesoál Embaixada Indonézia, simu reprezentante sira husi mídia nasionál oioin, inklui TATOLI, RTTL (Radio e Televisão de Timor-Leste), GMN (Grupo Média Nacionál), STL (Suara Timor Lorosa’e), Independente, Radio Voz, HATUTAN, no seluk tan.
Embaixadór Okto Manik hato’o mensajen importante ba imprensa kona-ba dezafiu ne’ebé mídia hasoru iha era dezenvolvimentu teknolójiku ne’ebé lalais ba beibeik. Nia subliña katak velosidade divulgasaun informasaun atuál tenke iha balansu ho abilidade atu dixerni lia-loos hosi informasaun.
“Teknolojia mídia nian dezenvolve maka’as tebes. Informasaun sira bele espalla iha segundu balun nia laran, maski liuhosi plataforma sira hanesan Facebook no YouTube. Maibé, ita mós tenki kuidadu, tanba la’ós informasaun hotu ne’ebé sirkula hanesan loos,” nia hateten.
Nia alerta katak proliferasaun konteúdu husi mídia la’ós ofisiál sira, inklui liuhusi plataforma dijitál sira, iha potensiál hodi hamosu dezinformasaun. Tanba ne’e, jornalista sira presiza hadi’a sira-nia abilidade verifikasaun no mantein notísia nia ezatidaun.
Tuir nia, avansu teknolójiku, inklui intelijénsia artifisiál (IA), mós lori dezafiu foun tanba bele esplora hodi manipula informasaun.
“Agora ema bele kria konteúdu ho teknolojia ne’ebé hanesan tebes ho orijinál. Ida-ne’e hanesan dezafiu ida ba mídia sira hodi hadi’a liután sira nia koñesimentu, velosidade no ezatidaun,” nia hateten.
Embaixadór Okto mós subliña papél estratéjiku mídia nian hodi fó apoiu ba dezenvolvimentu nasaun ida-nian. Nia hein katak mídia iha Timor-Leste kontinua fó kontribuisaun pozitivu no la estraga orden sosiál.
“Mídia sira tenke halo parte iha dezenvolvimentu. Ita labele husik mídia sira sai destrutivu. Ita hotu iha kompromisu hodi harii Timor-Leste ida ne’ebé avansadu liu,” nia dehan.
Hatán ba pergunta kona-ba kolaborasaun mídia nian, Embaixadór Okto revela katak ninia gabinete halo ona diskusaun dala barak ho TATOLI no mídia sira seluk, inklui sira ne’ebé iha Indonézia, hodi esplora programa kapasitasaun jornalista nian.
“Ami planeia atu hala’o programa kursu badak durante loron rua to’o tolu liuhusi Sentru Kulturál Indonézia, hodi fahe esperiénsia entre jornalista Indonézia no Timor-Leste,” nia esplika.
Entretantu, iha ninia mensajen ba jornalista sira, Embaixadór Okto haktuir hikas importánsia kapasitasaun, tantu iha aspetu tékniku hanesan fotografia no videografia, no mós iha abilidade reportajen ne’ebé lalais.
Nia mós fó hanoin ba mídia sira atu labele monu ba lasu prátika reportajen nian ne’ebé depende de’it ba títulu sensasionál sira lahó apoiu konteúdu ho kualidade.
“Konteúdu tenke ekilibradu. Labele iha de’it títulu bombastiku sira lahó konteúdu ne’ebé fó apoiu. Mídia tenki mantén profisional no mantén kualidade,” nia dehan.
Embaixadór Okto hato’o nia apresiasaun ba mídia nia apoiu durante hala’o kna’ar iha Timor-Leste, no hato’o nia esperansa katak relasaun di’ak ne’e sei kontinua iha futuru.
Jornalista : Hortencio Sanchez
Editór : Cancio Ximenes
