BAUKAU, 31 Marsu 2026 (TATOLI)–Serbisu Munisipál Saúde Baukau (SMSB) rejista pasiente sofre moras dengue hamutuk 215 iha-ne’ebé rezulta na’in-tolu lakon vida.
Xefe Departamentu Programa Saúde Munisípiu Baukau, Maria Cândida dos Reis rekoñese tinan-ne’e kazu dengue iha Baukau númeru sa’e bainhira kompara ho tinan 2025 ne’ebé rejista kazu 16, nune’e apela ba autoridade lokál atu serbisu hamutuk ho SMSB halo prevensaun ba kazu dengue iha Munisípiu Baukau.
“Husi Sentru Saude sira barak mak iha Baukau Vila tuir tan mak Venilale no Vemasse,” Maria Cândida dos Reis hateten bainhira lidera enkontru ho autoridade lokál Postu Baukau Vila iha edifísiu SMSB Vila Antiga, Tersa ne’e.
Nia relata SMSB rejista totál kazu dengue referida iha trimestrál dahuluk inísiu tinan-ne’e iha-ne’ebé Taxa Kazu Fatalidade (CRF-sigla inglez) ho pursentu 1,4 hodi rezulta vítima na’in-tolu idade labarik lakon vida.
Husi kazu 215 ne’e klasifikadu ba tolu hanesan Leve hamutuk kazu 128, moderadu 84 no Severa na’in-tolu (3), enkuantu kazu 103 kategoria ba grupu vulnerável ne’ebé afeta ba vítima idade 5-14 ne’ebé rezulta balun lakon vida no kazu 80 afeta ba labarik idade 1-4.
Iha fatin hanesan, Koordenadór Grupu Suporta Inan (GSI) Suku Kaibada Makasae, Manuel Guterres Freitas sente preokupa ho númeru kazu dengue iha Baukau ne’ebé hahú aumentu nune’e kompromete sei disemina informasaun kona-ba prevensaun ba komunidade iha Suku Kaibada Makasa’e.
“Ami sei hato’o ba konsellu suku hodi avizu ba komunidade preve dengue. Bainhira deteta sei rekomenda ba sentru saude hodi halo tratamentu,” Manuel Guterres hateten.
Entretantu, husi númeru kazu 215 maioria rejista aas iha Postu Baukau Vila hanesan Sentru Saúde Tirilolo hamutuk kazu 121 no Sentru Saúde Uailili sai episentru ho kazu 33.
Jornalista: Natalino Belo
Editór: Xisto Freitas da Piedade
