KOVALIMA ,31 Marsu 2026, (TATOLI) – Autoridade Munisípiu Kovalima orienta ba Sekretáriu Tékniku Administrasaun Eleitorál (STAE) atu fasilita komunidade hasai kartaun eleitorál husi semi biométriku ba biométriku.
“Ba Sekretáriu Tékniku Administrasaun Eleitorál (STAE) atu aselera atendimentu ba komunidade hasai kartaun eleitorál biométriku,” PAM Kovalima, Miguel Armada Cardoso hato’o iha Salaun AMC-Suai.
Razaun komunidade atu hasai kataun eleitorál bainhira eleitór to’o rihun 53 iha eleisaun Munisipàl sei hetan kadeira 13, nune’e presiza prosesu lalais bainhira iha eleisaun Munisipál bele hetan kadeira 17.
Partidu Polítiku sirane’ebé mak hetan asentu parlamentar no lidér komunitária sira iha obrigatóriu atu disemina informasaun ba komunidade ne’ebé mak tinan 17 atu hasai kartaun eleitorál.
Bazeia ba dadus ne’ebé mak Diretór STAE Kovalima,João Tilman, aprezenta hahú 2024 to’o 2026 rejista ona eleitór ne’ebé mak hasai eleitorál hamutuk 53.795 husi númeru ne’e komunidade ne’ebé mak atualiza sira nia kartaun eleitorál husi semi biométriku ba biométriku hamutuk 18.083.
Aleinde ne’e ba komunidade ne’ebé mak ho idade 17 hodi hasai kartaun eleitorál foun hamutuk 2.138 no eleitór ne’ebé mak seidauk troka kartaun eleitorál ba biométriku hamutuk 33.542.
Komunidade ne’ebé mak atu hasai eleitorál foun presiza lori dokumentu Sertidaun RDTL orijinál no foto kopia ho lori deklarasaun husi xefe suku.Ba ne’ebé mak atu atualiza kartaun eleitorál presiza lori dokumentu mak hanesan sertidaun RDTL no BI orijinál.
Jornalista:Celestina Teles
Editór: Florencio Miranda Ximenes
