DILI, 31 Marsu 2026 (TATOLI)-Uniaun Europeia (UE) hakarak reforsa nia apoiu ba Parlamentu Nasionál (PN) hodi trata lejizlasaun sira ba pós-adezaun hodi asegura integrasaun país nian iha Asosiasaun Nasaun Sudeste Aziátiku (ASEAN, sigla inglés).
Embaixadór Uniaun Europeia, Thorsten Bargfrede, hateten hafoin enkontru ho Prezidente Parlamentu Nasionál, Maria Fernanda Lay, ohin.
Nia hateten sorumutu ho Prezidente Parlamentu ne’e ho objetivu mak diskute kooperasaun entre UE no Timor-Leste iha área oioin, liuliu apoiu integrasaun país ne’e nian hodi sai membru plenu ba ASAEAN.
Aleinde ne’e, aborda mós vizita UE nian ne’ebé importante tebes hodi rona lian husi Timor-Leste. “Ita mós diskute kooperasaun ho Parlamentu ba futuru posibilidade sei apoiu Parlamentu reforsa lejizlasaun hodi implementa kompromisu ASEAN”, dehan.
UE sai parseiru importante Timor-Leste nian hodi apoia país ne’e iha área hanesan justisa, dijitalizasaun, setór privadu no investimentu. Iha mós programa barak serbisu hamutuk ho Organizasaun Nasaun Unida, liuhusi Programa Alimentár Mundiál, Organizasaun Internasionál ba Traballu, ba apoia nutrisaun, inkluzaun no serbisu mós ho sosiedade sivíl.
Antes ne’e, Vise-Ministra ba Asuntu ASEAN, Milena Rangel, hateten Timor-Leste presiza kumpre tan instrumentu legál hamutuk 48 iha pós-adezaun hodi asegura integrasaun país nian ba ASEAN.
Lejizlasaun sira ne’e balun sei lori bá Parlamentu Nasionál hodi diskute no aprova no balun hetan de’it aprovasaun iha nivel Konsellu Ministru.
Lembra katak, iha loron 26 fulan-Outubru 2025, Timor-Leste tama ofisialmente hanesan membru plenu ASEAN ba da-11.
Jornalista: Nelson de Sousa
Editotra: Maria Auxiliadora
