BAUKAU, 01 Abríl 2026 (TATOLI)—Serbisu Munisipál Obra Públika (SMOP) Baukau deklara estrada diresaun Suku Kaibada Makasae ba Buruma posibilidade sei tama prioridade iha planu orsamentu 2027.
Diretór Serbisu Munisipál Obra Públika Munisípiu Baukau, Agostinho Ximenes, rekoñese estrada ne’ebé lokaliza iha Suku Kaibada Makasae kategoria nu’udár estrada urbana maibé kondisaun grave maibé parte téknika finaliza ona levantamentu dadus no relata ona ba nasionál ne’ebé posibilidade sei reabilita iha tinan 2027.
“Estrada iha diresaun Kaibada Makasae tama iha estrada urbana. Karik 2027 ita-nia Ministériu bele tau matan ona,” Agostinho Ximenes hateten iha ninia kna’ar fatin, Vila Nova, Kuarta ne’e.
Estrada diresaun referida hahú husi Aldeia Betulale, Suku Tirilolo to’o Buruma ne’ebé sei kobre aldeia rua iha Kaibada Makasae hanesan Data-Ua no Kai-Obilale hamutuk kilómetru tolu-resin iha-ne’ebé konstrui iha tempu Indonézia nu’udár dalan aternativu ba Postu Laga, Baguia no Munisípiu Lautein.
Entretantu, antes ne’e, iha tinan 2024 Governu liuhusi Ministériu Obra Públiku liuhusi Diresaun Nasionál Kontrolu Estrada no Ponte (DNCEP-sigla portugeza) halo estudu no levantamentu dadus ba estrada urbana inkluindu ona ho estrada Suku Kaibada Makasae.
Jornalista: Natalino Belo
Editór: Xisto Freitas da Piedade
