Governu autoriza despeza millaun $168,8 ba akizisaun gazóleu litru millaun 80
DILI, 01 Abríl 2026 (TATOLI)—Governu liuhusi reuniaun Konsellu Ministru aprova deliberasaun, despeza no abertura husi prosedimentu aprovizionamentu ida ba akizisaun kombustível, ho autorizasaun despeza maizumenus millaun $168,8 ba akizisaun gazóleu litru millaun 80, nomós ba implementasaun prosedimentu aprovizionamentu liuhusi ajusta diretu urjente.
Proposta deliberasaun ne’e aprezenta Ministru Petróleu no Rekursu Minerál, Francisco da Costa Monteiro, liuhusi reuniaun Konsellu Ministru.
Desizaun ida-ne’e ho objetivu atu garante estabelesimentu rezerva seguransa ida ho autonomia to’o tinan ne’e nia rohan, hanesan antesipasaun karik akontese falta kombustivel ne’ebé maka’as liu tanba prolongamentu hosi konflitu iha Médiu Oriente.
“Di’ak ohin ami mai aprezenta proposta ba deliberasaun hodi permite atu iha akizasaun ba kombustivel 80.000.000 litrus ba rezerva nasionál, tamba ita haree katak funu iha médiu oriente ne’e seidauk remata,” Ministru Petróleu no Rekursu Minerál, Francisco da Costa Monteiro, hateten hateten ba jornalista sira hafoin ramata enkontru Konsellu Ministru ha Palásiu Governu, ohin.
Tanba ne’e, nia hatutan, Governu tenke iha ona medida preventiva sira liuliu preparasaun estoke kombustível iha rai-laran, nune’e sei fó biban ba Empreza Esperansa Timoroan (ETO) mak sei sai importadór kombustível.
Antes ne’e, iha 18 Marsu ne’e, Governu liuhusi Ministériu Petróleu no Rekursu Minerál (MPRM) garante estoke seguransa fornesimentu mina no gás sei asegura to’o fulan rua oin mai, maske funu iha médiu oriente seidauk ramata.
Ministru Petróleu no Rekursu Minerál, Francisco da Costa Monteiro, nota katak iha preokupasaun lubuk ida husi sosiedade timorense kona-ba situasaun merkadu mundiál ba mina no gás liuliu ba kombustível, liuliu iha Timor preokupa maka’as liubá presu kombustível.
“Ha’u hanoin pontu importante ida ha’u hakarak atu relata mak to’o ohin loron, ita la’ós iha faze krítiku tanba ita-nia seguransa kombustível ba ita-nia nasaun sei di’ak hela no aseguradu to’o fulan rua oin mai,” Ministru ne’e informa ba jornalista sira iha Gabinete MPRM, Faról, tersa ne’e (17/03).
Jornalista : Alexandra da Costa
Editór : Cancio Ximenes
