DILI, 01 Abríl 2026 (TATOLI)—Konsellu Ministru aprova no delibera tema “Salvaguarda Eransa Kulturál, iha Promosaun Identidade no Sidadania” ba sorumutu Ministru Kultura Komunidade País sira Lian Portugés (CPLP, sigla lian portugés) nian ba da-XIV iha Timor-Leste.
“Ha’u aprezenta de’it tema ba Konferénsia Ministru kulturál CPLP ne’ebé sei realiza sorumutu ida iha Timor-Leste, tanba sei iha ezersísiu Prezidénsia CPLP, sei sai uma-na’in no organiza iha loron 04-05 Maiu 2026,” Ministru Juventude Arte no Kultura, Nelyo Isaac Sarmento, hateten ba jornalista sira hafoin ramata reuniaun Konsellu Ministru iha Palásiu Governu, ohin.
Nia dehan, tema ne’ebé aprova ona destaka kontribuisaun kultura ba konsolidasaun Estadu Direitu demokrátiku, diálogu interkulturál nomós reforsu kooperasaun kulturál iha espasu luzófonu.
Governu aprova dekretu-lei alterasaun ba orgánika MTA
Entretantu, iha biban hanesan, Governu aprova projetu Dekretu-Lei nú. 78/2020, loron 11 fulan-outubru kona-ba alterasaun orgánika Ministériu Turizmu no Ambiente. Proposta ne’e aprezenta husi Vise-Primeiru-Ministru, Ministru Koordenadór Asuntus Ekonómiku no Ministru Turizmu no Ambiente, Francisco Kalbuadi Lay, iha reuniaun Konsellu Ministru, kuarta ne’e.
Bazeia ba dokumentu ne’ebé Agência Tatoli asesu katak diploma ida-ne’e ho objetivu prinsipál atu hametin efisiénsia no koerénsia organizasaun administrativa Estadu nian, liuhusi reestruturasaun entidade públika no integrasaun funsaun iha estrutura ministeriál sira, atu nune’e bele halakon redundánsia no hadi’a koordenasaun iha ezekusaun polítika públika.
Ho diploma ida-ne’e, halakon Autoridade Nasionál Dezignada ba Kombate Alterasaun Klimátika, no ninia kompeténsia sira, rekursu umanu, finanseiru no patrimoniál sira sei integra iha Ministériu Turizmu no Ambiente.
Jornalista : Alexandra da Costa
Editór : Cancio Ximenes
