DILI, 04 Abríl 2026 (TATOLI) – Prezidente Federasaun Futeból Timor-Leste (FFTL), Nilton Gusmão husu ba públiku hadomi futeból sira atu fó nafatin konfiansa ba FFTL no Asosiasaun Futsál Timor-Leste (AFTL) atu nune’e organiza futeból no futsál ba oin.
“Ita sei iha frakeza, maibé ita buka atu hadi’a nafatin, maibé ha’u husu atu sosiedade hadomi futeból sira fó fiar nafatin iha federasaun, iha mós asosiasaun futsál atu organiza ita-nia futeból no futsál iha ita-nia rain no prepara atu ba halo kompetisaun internasionál sira ho dignidade,” Nilton hateten ba jornalista sira iha edifisiu FFTL Dili, sábadu ne’e.
Nia dehan, jogadór sira hatudu duni jogu ne’ebé di’ak duurante ne’e, hanesan iha eventu internasionál sira Timor-Leste ladun sofre ona golu ne’ebé boot.
“Ita hatudu ho dignidade, se ita ba joga la sofre ho golu ne’ebé barak, ida-ne’e hatudu progresu ida, ita mós tenke rekoinese buat ne’ebé iha nia mudansa ne’e, labele haree de’it ba lakon ne’e, ami mós hakarak ita ba atu manán, jogadór sira tan, sira nia objetivu ne’e atu manán, la’ós atu lakon, maibé iha futeból, iha futsál, atividade desportu hotu nia lalaok mak hanesan ne’e,” nia dehan.
Nia hatutan, ho nune’e mak FFTL, buka meiu hotu atu hadi’a futeból iha nasaun ne’e tanba misaun no objetivu boot liu mak transforma futeból sai orgullu nasionál.
“Loos duni bainhira manán mak transforma futeból sai orgullu nasionál, maibé ita organiza di’ak hola parte ona mós husi transforma ita-nia futeból sai orgullu nasionál, tanba saida mak ha’u dehan ita organiza di’ak sai mós parte orgullu nasionál, tanba ita transforma ona ita-nia atividade ba ona nivel ne’ebé di’a liu, partisipasaun ema nian ohin loron ita haree barak tebes, ema hotu nia atensaun ba futeból ohin komesa luan liutan, ita organiza kompetisaun iha ita-nia rai laran ema mai barak tanba saida, tanba orgullu nasionál ne’e, ema hotu sente pertense ba atividade futeból ne’e,” Nilton hateten.
Laiha hili malu iha Selesaun Nasionál
Iha okaziaun ne’e, Prezidente FFTL klarifika mós kona-ba oinsá halo selesaun ba jogadór sira ba joga iha rai-liur hili tuir meritu no la hili família.
“Ha’u hakarak klarifika iha ne’e, selesaun ba joga la’ós reprejenta, se reprejenta entaun hili jogadór husi klube ida-idak tau hamutuk ba, maibé la’e ita haree jogadór ne’ebé iha kapasidade mak hili, ne’e mundu hotu halo, atu iha Espaina mós hanesan ne’e iha klube ida jogadór ne’ebé di’ak mak sira hili ba selesaun nasionál, la’ós hili hotu, ita haree iha selesaun jogadór mai husi klube tolu ou haat de’it, ida ne’e tanba hili tuir m’eritu,” Nilton klarifika.
Nia mós hatutan tan katak, bainhira hili jogadór sira ba selesaun nasionál kompetensia treinadór sira nian laós estrutura FFTL no AFTL.
“Atu hili jogadór sira ne’e kompetensia treinadór sira nian, la’ós federasaun mak hili, la’ós hili malu família mak ba, ha’u atu esklarese, nune’e atu ema labele bebeik katak jogadór sira ne’e mai tanba ida-ene’e mak haruka mai, ida ne’ebá mak haruka mai, ne’e la’ós, jogadór treinadór mak hili bazeia ba saida mak nia halo ona iha kampo laran,” nia esklarese.
Lakon ho Maldivas
“Loos, ema barak triste tanba ita-nia futeból 11, lakon ho Maldivas foin lalais, amibé ita haree ho loloos, tuir loloos ita tenke dehan ita iha progresu ruma, tanba ita hatama golu uluk, ida-ne’e hatudu katak ita iha ona nivel kompetetividade ida ne’ebé la’ós ona ema konsidera ita hanesan baibain, maibé ita iha ona estratejia rasik oinsa mak iha jogu ida ita bele rezulta golu,” nia hateten.
Tuir nia, iha selesaun nasionál iha futeból 11 no futsál sei iha frakeze maibé FFTL buka meiu hotu atu hadi’a no organiza di’ak liutan fuetból iha Timor-Leste.
Jornalista: Hortencio Sanchez
Editór: Florencio Miranda Ximenes
