DILI, 04 Abríl 2026 (TATOLI) – Prezidente Autoridade Munisípiu (PAM) Dili, Francisco dos Santos, informa Autoridade Munisípiu Dili presiza halo ezersísiu hafoin destaka pesoál iha estasionamentu Kristu Rei.
“Ita seidauk tau ema iha ne’ebá maibé ita kálkulu kada metru 10 ne’e ema ida signifika iha ne’ebá ita bele tau ema na’in 5 iha Kristu Rei no mós ema na’in 5 iha Dolok-oan maibé ita seidauk implementa tanba sei halo hela ezersísiu hodi tau ema iha ne’ebá,” PAM Dili dehan ba TATOLI via Whatsapp, ohin.
Prezidente Autoridade Francisco subliña PAM Dili daudaun ne’e tau ona iha planu parking meter ka parking ticket machine rua iha Kristu Rei nian hanesan, ida iha parte dalan tama ba odamatan boot Kristu Rei iha kafé Letefoho ka posibilidade iha dalan antes tama ba área Branka no ida seluk mak iha parte Kristu Rei nia kotuk.
“Ida-ne’e ba vizitante sira-ne’ebé liuhusi Kristu Rei kotuk, nune’e ba vizitante hotu-hotu tenke selu tuir oras ne’ebé tama-sai ka ba sira-ne’ebé tama tenke foti nota oras tama nian no bainhira sai filafali tenke hatudu nota atu ekipa ne’ebé servisu ba, bele haree hodi haruka vizitante sira selu tuir oras,” nia esplika.
Aleinde ne’e Autoridade Munisípiu Dili mós sei koloka ema estasionista no seguransa sira atu garante ka asegura transporte sira-ne’ebé mak para iha fatin refere inklui fasilita haris-fatin públiku iha área sira Kristu Rei nian.
“Kona-ba selu tarefa bazeia ba oras tama-sai, orsida mákina parking ticket mak deteta oras hira, entaun ita selu tuir ida-ne’e, hanesan ba motór para husi hahú oras tama to’o oras ida tenke selu ho $0,50 no ba karreta $1 ba oras ida, maibé kuandu para liu ona oras ne’e tenke selu tuir durasaun oras para nian,” Francisco dos Santos hatete.
Enkuantu, PAM Dili dehan ba vizitante sira ne’ebé ba vizita Kristu Rei, sira-nia transporte estasionista sira mak sei kontrola atu transporte sira hotu-hotu tenke para tuir fatin ne’ebé prepara ona no ba fasilidade seluk sira-ne’ebé mak iha ne’ebá sei tau mós ema atu kontrola fatin sira ne’e.
Prezidente Autoridade akresenta katak orsamentu atu rekruta pesoál ba fatin estasionamentu sira-ne’e la liu iha Komisaun RevizaunOrsamentu(KRO) maibé PAM Dili iha orsamentu poupansa hodi bele implementa.
“Ita iha orsamentu poupansa iha bens servisu, ha’u bele implementa ba asuntu ne’e. Ne’ebé sei utiliza osan porvolta $100.000 ba tinan ida nian,” PAM Dili dehan.
Aleinde ne’e, Autoridade Munisípiu Dili planu atu rekolla tan reseita iha Jardin Motael. Daudaun ne’e AMD planeia ona atu halo kioske portable ka kioske movel.
“Fatin hirak-ne’ebé ADM sei prepara ne’e, sei fó ba komunidade-ne’ebé iha interese hakarak halo negósiu atubele uza fatin ne’ebé AMD prepara, hodi hala’o negosiu, maibe tenke prienxe mós regra ne’ebé AMD sei fó sai. Tanba fatin ka kios portable ne’e hotu hotu-hotu sei halo husi Ai-Bambu ne’ebé ho kualidade.
“Planu AMD nian sei halo kios movel hamutuk 49 iha Jardín Motael no sei kontinua mós iha fatin sira seluk ne’ebé identifika ona. Ida-ne’e ami iha ona esbosu regulamentu retribuisaun, hein de’it despaixu husi Ministru Administrasaun Estatál bainhira despaixu tun ami sei aplika ba fatin ka espasu públiku sira hotu-hotu,” nia konklui.
Jornalista: Osória Marques
Editór: Florencio Miranda Ximenes
