MALIANA,04 Abríl 2026 (TATOLI) — Bispu Dioseze Maliana, Dom Norberto do Amaral hato’o katak “esperansa no fiar” sai nu’udar liafuan prinsipál iha selebrasaun Vizilia Paskal ka hader-kalan nian.
Iha selebrasaun ne’ebé konsidera nu’udar inan ba kalan sira hotu iha kalendáriu sarani nian, Bispu hateten katak: “Jesus Kristu nia moris hi’as husi mate lori mensajen naroman no moris foun ba ema hotu”.
Bispu esplika katak leitura sira husi antigu testamentu hatudu prosesu naroman ne’ebé hahú husi ahi ki’ik ida no kontinua sai boot, ne’ebé simboliza Kristu nu’udar naroman ne’ebé fó moris ba mundu.
“Kristu mai hanesan naroman ne’ebé halakon tiha nakukun, susar no mate,” dehan Bispu iha igreja Pro-Katedrál Maliana,sábadu kalan.
Bispu Don Norberto mós subliña istória evanjelu kona-ba feto na’in rua ne’ebé lao ba rate ho domin, ne’ebé ikus mai hasoru notísia katak Jesus moris hi’as ona.
Ne’e katak mensajen ne’ebé bolu ema hotu atu la tauk no fiar metin iha Maromak.
“Mate laiha ona kbi’it, tanba Kristu manan ona mate no fó fila-fali moris ba ita hotu,” nia Amu Bispu.
Tuir Bispu, selebrasaun Paskál fó ba ema sarani sira oportunidade atu hafoun sira nia fiar no kaer metin esperansa ne’ebé mai husi Kristu, ne’ebé la hanesan esperansa mundu nian, maibé fó laran-metin no diresaun ba moris.
Nia mós konvida sarani sira atu foti oin ba leten no kontinua tuir dalan ne’ebé Kristu hatudu, ho laran haraik-an, domin malu no moris tuir lia-loos.
Iha ikus liu,Bibi-atan ne’e husu fiéis sira atu lori “esperansa no fiar” nu’udar pontu reflesaun iha tempu Páskua, hodi hasa’e sira nia relasaun ho Maromak no moris tuir nia hakarak.
“Keta tauk, Kristu moris hi’as ona, fó mai ita esperansa foun,Aleluia-aleluia”, katak Bispu.
Selebrasaun misa ne’e partisipa husi Prezidente Autoridade Munisípiu Bobonaru,Paulo Moniz Maia, Autoridade Sivíl,Militár,veteranu no sarani sira hotu.
Notísia Relevante: Páskua mak mistériu fé no esperansa ba foin-sa‘e
Jornalista: Sergio da Cruz
Editór: Florencio Miranda Ximenes
