Autoridade Queensland Police Service buka daudaun traballadór timoroan mout iha tasi Austrália
DILI, 07 Abríl 2026 (TATOLI)—Sekretária Estadu Formasaun Profisionál no Empregu (SEFOPE) liuhusi Dirasaun Nasionál Empregu Estranjeiru (DNEE) simu ona informasaun kona-ba traballadór timoroan Joel Assa ne’ebé mout iha tasi iha área Emerald Beach Coffs Harbour New South Wales (Austrália).
Diretór Nasionál Empregu Estranjeiru, João Correia, hateten agora daudaun autoridade lokál sira liuliu Queensland Police Service hala’o hela operasaun buka no salvamentu maibé to’o agora seidauk hetan rezultadu ba traballadór timoroan ne’e rasik.
“Aleinde ekipa patrúlla, Embaixada, Adidu traballu servisu hamutuk hodi kontinua buka iha área suspeitu ho apoiu ekipamentu salvamentu no monitorizasaun iha tasi,” Diretór ne’e informa ba Agência TATOLI liuhusi telefónika, ohin.
Nia informa katak konfirmadu duni raballadór ne’e ho naran Joel Assa, moris iha Viqueque, Afaloicai iha loron 07 Juñu 1995 husi aman Agustinho Assa no inan Agustinha Assa.
Joel Assa hetan oportunidade husi Estadu Timor-Leste liuhusi SEFOPE ho programa PALM (Pacific Australia Labour Mobility) iha tinan 2019 hodi rejistu ba iha sistema Work Ready Pool iha IRD system, ho Nu ref, TL- SWP-19-1363, ikus mai hetan oportunidade hodi ba servisu iha Austrália, iha loron 03 Outubru 2024 to’o loron 07 Juñu 2025, iha kompania ou agency CONNECT GROUP (ROSE FARM) hanesan traballadór durante fulan-sia (9) tuir vistu no kontratu ne’ebé iha.
“Maibé Joel Assa foti desizaun sai husi sistema (Asbconded) husi Kompania Agency Connect Group (Rose Farm) iha loron 22 Janeiru 2025 no iha loron 06 fulan-Abríl 2026 hetan informasaun katak traballadór Joel Assa lakon ka mout iha tasi iha área Emerald Beach coffs Harbour New South Wales (Austrália) insidente ne’e akontense hafoin Vitima ba kail ikan iha tasi,” nia dehan.
Nune’e mós, tuir Embaixadora Timor-Leste ba Austrália, Inês Almeida, hateten tuir informasaun ne’ebé nia simu katak traballadór ne’e sees ona husi sistema, nia foin ba semana ida iha fatin ne’e (Sidade ne’e).
“Entaun husi Perth ba fatin ne’e se lori ho karreta kuazé oras-neen mak to’o sira nia fatin ne’e. Ohin dadeer, ha’u kontaktu ona Polísia iha ne’ebá dehan horikalan sira tenke para buka Joel, tanba kalan liu ona maibé ohin dadeer tuku 09h00 sira kontinua buka fali,” nia informa.
Aleinde ne’e, tuir sasin-matan traballadór timoroan, Agusto Soares, hateten nia hela hamutuk ho Joel asa no bainhira sai husi servisu, vítima Joel Asa ho kolega ida seluk bolu malu ba kail ikan iha tasi.
“Sira na’in-rua ba tiha uluk hafoin ha’u tuir ba, ha’u haree tasi boot, ne’ebé ha’u ko’alia ba sira na’in-rua dehan tasi boot hanesan ne’e ha’u tauk no ha’u la brani ida. Nune’e, kolega na’in-rua ne’e mak kail, ha’u tuur dook hodi haree de’it,” sasin-matan ne’e haktuir liuhusi voice ne’ebé jornalista asesu iha grupu WhatsApp.
Nia hatutan, maibé derepente de’it kala kolega ida kail kona ikan maibé dada la sai, entaun sira na’in-rua (2) deside tesik ba sorin buka tuir kail nia talin, nia konsege dehan ba sira lalika ba maibé sira rua nafatin tuun ba tasi laran.
“Entaun lakle’ur laloran boot mai, ha’u hakilar dehan halai, maibé la halai, nune’e laloran boot ne’e mai baku nia, hakfodak, ami-rua kolega seluk hateke ba rai mamuk tiha ona. Maske, nia konsege hakilar maibé tasi ne’e kle’an, ami hamri’ik de’it iha fatuk leten. Entaun ha’u halai fila ba uma hodi kontaktu ba polísia hodi ba buka kedas kolega Joel nia paradeiru,” nia esplika.
Notísia Relevante: Traballadór timoroan Joel Assa mout iha tasi Coffs Harbour Austrália
Jornalista : Alexandra da Costa
Editór : Cancio Ximenes
