VIKEKE, 07 Abríl 2026 (TATOLI) – Família no Estadu Timor-Leste haloot ona saudozu Luis Pinto “Maulesa” iha semitériu públiku Asamatadu, suku Makdique de Baixo, postu administrativu Uatulari, munisípiu Vikeke.
Matebian Maulesa hakotu iis semana kotuk iha ninia rezidénsia, suku Makdique de Baixo hafoin sofre moras komplikadu.
Maulesa hahú moras iha 2022 no halo tratamentu regular iha sentru saúde postu administratvu Uatulari, maibé lakonsege hetan rekuperasaun. Ikus mai família deside halo tratamentu ho ai-moruk tradisionál.
Durante serimónia funebre, reprezentante Konsellu Kombatente Libertasaun Nasionál (CCLN-Sigla Portugés) Vikeke, Afonso Calic expresa sentimentu triste tanba lakon ona veteranu “Maulesa” ne’ebé mak fó kontribuisaun maka’as ba prosesu ukun rasik-an.
Ho nune’e, nia husu ba veteranu sira atu buka tratamentu bainhira hetan moras.
“Ba maluk veteranu sira bainhira moras tenke buka dalan asesu ba fasilidade saúde hodi hetan tratamentu,” Afonso Calic hateten iha serimónia funébre, ohin.
Nia mós husu ba veteranu sira atu informa ba CCLN bainhira hetan moras: “Nasaun sei presiza maluk veteranu sira, tanba ne’e kuanndu moras tenke fó-hatene CCLN no maluk veteranu seluk.”
Afonso husu ba saúdozu Maulesa nia família atu prepapra dokumentu hodi submete bá CCLN atu prosesa fila fali ninia pensaun ba oan sira.
Xefe suku Makadique de Baixo, Rogério da Silva, promote ba oin autoridade suku, liuhosi ninia lideransa sei tau atensaun ba veteranu iha suku referidu.
Pedro da Cruz, reprezenta família hatoo agradese wain ba parte hotu nebeé mak marka prezensa iha serimónia funébre ne’e. “Ami-nia aman fó ona kontribuisaun ba luta libertasaun,” Pedro haktuir.
Durante luta ba ukun rasik-an, Saudozu “Maulesa” hetan kapturasaun no tortutrasaun grave, hodi prejudika ba ninia saúde.
Biografia Saúdozu Luis Pinto “Maulesa”
Luis Pinto “Maulesa”, moris iha suku Macadique, iha loron 23 Abríl 1945, nu’udar oan da-tolu (3) hosi Mano-Rubi (Aman-Matebian) no Bui-Dara (Inan-Matebien). Maulesa iha maun alin nain haat.
Maulesa iha oan na’in 12. Oan na’in 10 hamutuk ho nia espoza dahuluk, Angelina Pinto (Matebian) no oan na’in rua ho nia kaben daruak Celina da Siva.
Iha loron 07 Dezembru, 1975, bainhira Indonezia invade Timor-Leste, Maulesa komesa kedas envolve-an iha luta libertasaun nasionál
Iha loron 31 Dezembru 1978, saúdozu envolve iha Frente Armada.
Iha loron 15 Marsu 1979, Maulesa hetan kapturasaun no detensaun iha postu antigu Uatulari to’o loron 17 Maiu, 1979.
Husi loron 13 Marsu 1992 to’o loron 14 Setembru 1998, saúdozu envolve-an iha rede Frente Klandestina.
Governu rekoñese kontribuisaun saudozu Maulesa nian ba ukun rasik-an ho pensaun 8 a 14 (Grau-3) no simu Kondekorasaun Ordem Nicolau Lobato.
Jornalista: Vitorino Lopes da Costa
Editór: Filomeno Martins
