Inspetór Jerál ME halo ona investigasaun ba manorin halo abuzu sexuál hasoru estudante
DILI, 07 Abríl 2026 (TATOLI)—Ministériu Edukasaun (ME) simu ona keixa hosi inan-aman kona-ba manorin ne’ebé halo abuzu sexuál hasoru estudante ida iha eskola ida iha Dili.
“Ami simu ona karta husi inan-aman, agora inspesaun jerál ME tun ona ba eskola ne’e hodi halo investigasaun prelimináriu, eskola rasik kontaktu ona advogadu no halo ona investigasaun ba kazu ne’e,” Ministra Edukasaun, Dulce de Jesus Soares, hato’o ba Jornalista sira, iha salaun ME, Vila-Verde, Tersa ne’e.
Tuir informasaun, Polísia Nasionál Timor-Leste (PNTL) halo ona detensaun ba manorin ne’ebé suspeitadu komete abuzu sexuál.
Ministra rejeita atu fó sai kazu ne’e akontese iha eskola internasionál ida tanba prosesu ne’e tanba ona ba justisa.
“Iha situasaun ne’e ita labele revela lai eskola ne’e nia naran. Maibé ita respeita ema-nia prezusaun de inosénsia, ema-nia seguransa. Entaun, Ministériu la revela ida-ne’e, maibé ministériu kontinua halo nia knaar, ita akompaña prosesu no ami mós halo ona investigasaun,” nia akresenta.
Notísia relevante : SEI-MESSK kontinua diskute proposta lei ba asédiu sexuál
Governante ne’e dehan, ministériu iha ona planu atu aplika regra rigór ba eskola rejistadu iha Timor-Leste, liuliu eskola internasionál sira. Tanba bainhira akontese kazu sira hanesan ne’e, ministériu mak responsabiliza, enkuantu eskola sira hetan lisensa operasionál husi fatin seluk hodi operasionaliza iha Timor.
“Ita konvida sé de’it mak mai ita atu ajuda dezenvolvimentu iha ita-nia rain inklui edukasaun. Maibé rai ida-ne’e iha lei no tenke la’o tuir lei,” Ministra katak.
Membru Governu ne’e subliña, sé de’it mak mai loke eskola iha Timor-Leste tenke hetan lisensa iha ME no Gabinete Avaliasaun Lisensiamentu Akreditasaun (GALA).
“Kuandu akontese hanesan ne’e ita hatene katak eskola ne’e iha ona lisensiamentu ka lae? Nia priense ona ita-nia padraun mínimu ka lae, bainhira ita la kontrolu, akontese kazu hanesan ne’e ita komesa dun malu. Ami nafatin halo knaar tuir protofolio Ministériu nian. Tanba kazu ne’e ita entrega ba PNTL no Ministériu Públiku hodi prosesa ba oin,” Dulce fundamenta.
Ministra esklarese, manorin ne’ebé komete kazu abuzu sexuál hasoru estudante iha eskola balun iha Dili laran ne’e la’ós ME mak rekruta.
“Ita koloka manorin ba fundasaun Katolika, maibé iha eskola internasionál sira ita la koloka manorin funsionáriu públiku,” nia reforsa.
Jornalista : Osória Marques
Editora : Julia Chatarina
