DILI, 07 Abríl 2026 (TATOLI) – Komisaun F iha Parlamentu Nasionál (PN) ne’ebé Trata Asuntu Saúde, Igualdade Jéneru no Inkluzaun Sosiál, solisita ba Ministériu Saúde (MS) hodi harii tan unidade saúde hodi apoia ema ho defisiénsia mentál.
Maria Teresa Gusmão, deputada no menbru husi Komisaun F, hatoo solisitasaun ne’e relasiona ho akontesimentu iha loron 06 fulan-Marsu, iha ne’ebé sidadaun ida suspeitadu ho problema mentál hodi tudik iha liman sona ema na’in-haat iha área Komoro, Kampung Baru, Postu Administrativu Dom Aleixo, ne’ebé rezulta vítima ida hakotu iis no na’in-tolu kanek grave.
Objetivu husi harii unidade ne’e hodi halo avaliasaun no diagnóstiku, tratamentu no akompañamentu, reabilitasaun no dezenvolvimentu kompeténsia, apoiu psikossosiál, edukasaun no orientasaun ba família no prevensaun no intervensaun prekose.
“Ita observa iha Dili no munisípiu sira ema ho defisiénsia mentál kuaze iha fatin hothotu. Agora iha klínika iha Laklubar, maibé labele akumula hotu, tanba fatin la sufisiente, presiza duni harii tan klínika,” nia hateten iha PN, ohin.
Tuir nia, bainhira la tau atensaun sériu, maka situasaun ne’ebé la espera bele akontese hanesan ho akontesimentu liubá. “Husu ba família sira karik iha menbru família ruma ne’ebé ho moras mentál hodi ba tratamentu iha fasilidade saúde no parte Ministériu Saúde tenke sosializa ba komunidade, hodi enkoraza no hatene hodi nune’e labele izola no diskrimina sira,” apela.
Notísia relevante:Sidadaun suspeitadu moras mentál sona ema na’in-haat iha Komoro kapturadu no detein ona iha sela
Jornalista: Nelson de Sousa
Editora: Isaura Lemos de Deus
