DILI, 07 Abríl 2026 (TATOLI)—Membru Polísia Nasionál Timor-Leste (PNTL) no FALINTIL-Forsa Defeza Timor-Leste (F-FDTL) balun envolve iha kazu ilísitu iha fronteira, hatama motorizada ho marka RX-King ida mai Dili.
Kazu ne’e akontese iha Sesta (03/04) maizumenus tuku 16:00, bainhira ekipa konjunta husi informasaun Polísia nian husi Servisu Nasionál Intelejénsia (SNI) no Forsa konsege deteta movimentu transporte balun ne’ebé transporta sasán kontra bandu husi fronteira tama kapitál Dili, nune’e ekipa duni tuir no konsege deteta katak membru Forsa Armada ida husi institusaun F-FDTL fasilita hela tranzasaun halo atividade kontra bandu.
“Membru PNTL ne’ebé envove iha atividade ne’e ho inisiál SP no membru Forsa Armada Komponente Navál ho inisiál ED, ita asegura kedan iha tempu ne’ebá, ho sasán evidénsia halo ona prosesu ho númeru NUC 0117/2026-PNSIK ne’ebé aprezenta ona ba Ministériu Públiku,” Portavós PNTL, Superintendente Xefe Polísia João Belo dos Reis, hato’o ba Jornalista sira, iha Kuartél Jerál PNTL, Kaikoli, Tersa ne’e.
Notísia relevante : MP kontinua investiga kazu ilísitu no burla informátika iha Oekusi
Nia relata, Polísia rekolla ona informasaun katak membru PNTL husi Unidade Polísia Marrítima envolve direita iha prosesu tranzasaun.
“Depoizde ita loke investigasaun, ita deteta katak sira na’in-rua iha relasaun família no nia kolega foti nia karreta ba uza ne’e, nia la informa nune’e laiha koñesimentu, depois bainhira karreta ne’e bá to’o fronteira, nia na’in la hatene Polísia halo tiha apreensaun mak nia foin hatene,” nia relata.
Komandante João hateten, karreta ne’e tula motorizada RX-King, ne’ebé aprezenta ona ba Ministériu Públiku no kategoriza hanesan sasán kontra bandu.
Membru PNTL no Forsa Armada hatama sasán liuhusi Palaka Batugade, depois tuir informasaun, ekipa konjunta husu karreta ne’ebé lori motorizada ne’e para maibé nia la koopera, nune’e ekipa sira duni tuir no ikus mai konsege tama iha kapitál Dili, hafoin maka detein.
Nia dehan, tuir informasaun iha karreta ne’e nia laran hetan mós kilat anin, maibé bainhira ekipa konjuta hapara tiha karreta, identifika katak karreta tula de’it motorizada.
“Investigasaun sei la’o hela, buka tuir sasán sira ne’ebé mak ita deskonfia, sira bele asegura nafatin,” nia katak.
Kazu ne’e PNTL konsidera nu’udar fraglante delitu tamba bainhira membru PNTL no F-FDTL tula motorizada bá karreta iha área Palaka, ekipa konjunta deteta kedan no husu atu koopera maibé kondutór mak la koopera.
“Daudaun ita halo hela investigasaun ba membru PNTL no membru Komponente Navál. Ita la detein sira tanba ita husu orientsaun ba Minisériu Públiku, orienta ba ita atu halo prosesu normál. Buat hothotu ita halo ne’e na’in ba prosesu tomak mak Ministeriu Públiku, ita ezekuta orientasaun ne’ebé iha,” nia katak.
Maski nune’e, investigasaun ba membru PNTL ne’e sei kontinua la’o tanba prosesu krime ne’e nafatin ba oin.
“Membru PNTL halo ninian atividade no depois ita haree mós kualker tempu karik iha evidénsia relasaun ba nia envolvimentu ita sei bolu fali nia mai,” nia tenik.
Iha biban ne’e, Portavós PNTL ne’e dehan, atu prevene atividade ilísitu iha fonteira, Komandante Jerál fó atensaun ba Komandu UPF no UPM inklui Servisu Intelejénsia sira atu halo serbisu ne’ebé di’ak liu hodi foku iha área fronteira hodi halo prevensaun ba ilísitu kontra bandu ne’ebé akontese iha liña fronteira.
“Polísia rasik halo serbisu iha limitasaun, maibé ita presiza nafatin kontribuisaun ho autoridade ne’ebé iha fronteira, ministériu interligadu ne’ebé mak halo ninia knaar iha liña fronteira, ita halo prevensaun ba kazu ilísitu, scaming iha liña fronteira,” nia hato’o.
Jornalista : Natalino Costa
Editora : Julia Chatarina
