KOVALIMA , 08 Abríl 2026 (TATOLI)–Aplikante husi postu administrativu hitu na’in-290 tuir ona teste entrevista ne’ebé mak durante-ne’e submete dokumentu hodi kompete iha prosesu rekrutamentu iha Institutu Nasionál Estatístika Timor-Leste (INTEL-I.P) Munisípiu Kovalima.
INETL-I.P loke vaga ne’e, tanba servisu hamutuk ho Ministériu Solidariedade Sosiál no Inkluzaun (MSSI) ne’ebé hetan apoiu finanseira husi ONG Internasionál Word Food Programme (WFP) kona-ba programa ai-han mundiál hodi ba rekolla dadus kona-ba programa Bolsa de Mãe Kondisionál no Saúde Nutrisaun ba Inan no Oan.
“Durante INETL-I.P loke vaga ne’e aplikante husi postu administrativu hitu hamutuk na’in-290 mak submete sira nia dokumentu. Husi númeru ne’e na’in-255 mak pasa hodi tuir teste entrevista na’in- 43 la pasa”, Prezidente Ekipa Juri , Fernando Ferreira, informa ba jornalista, iha edifisiu INETL-I.P Kovalima Tabakolot,ohin.
Ekipa juri sira ne’ebé hala’o teste entrevista mai husi INETL, I.P nasionál no munisípiu hala’o prosesu teste depende aplikante-sira husi postu administrativu hitu ne’ebé mak pasa iha selesaun dokumentu no hodi kotinua tuir teste entrevista.
Aplikante ne’ebé mak pasa iha faze entrevista husi INETL, I.P sei fasilita formasaun ba aplikante sira molok sira atu rekolla dadus bolsa da Mãe Kondisionál no saúde nutrisaun inan no oan iha kada postu administrativu no suku sira.
Bazeia vaga ne’ebé mak INETL-I.P fó sai presiza ema na’in-128 ne’ebé kada postu administrativu presiza koordenadór ema na’in-ida ho nia supervisór no enumeradór hodi rekolla dadus bolsa da Mãe Kondisionál no saúde nutrisaun inan no oan ne’ebé ho sira nia durasaun kontratu durante fulan ida.
Iha fatin hanesan, Aplikante Melinda de Jesus, sente kontente tanba nia parte pasa iha selesaun dokumentu no tuir teste entrevista ne’e hanesan parte ida bele hetan esperénsia.
“Ha’u sente kontente bainhira ha’u pasa ona iha selesaun dokumentu tuir teste entrvista ne’e mós hanesan parte ida bele aumenta ha’u nia koñesementu kona-ba tuir teste entrevista pasa ka la pasa hanesan timor-oan tenke simu”, nia dehan.
Jornalista: Celestina Teles
Editór:Florencio Miranda Ximenes
