DILI, 08 Abríl 2026 (TATOLI)—Ekipa selesaun nasionál husi nasaun Irake no Kongo mak hanesan nasaun ikus liu ne’ebé susesu ultrapasa ba tasa mundiál 2026, entre nasaun hamutuk 48 seluk ne’ebé asegura ona sira-nia fatin iha Tasa Mundiál referida, ne’ebé sei realiza iha Amerika Norte iha 11 Juñu to’o 19 Jullu 2026.
Repúblika Demokrátika Kongo hetan vitória surpreza ida hodi halakon Jamaika ho 1-0 hafoin tempu adisionál iha finál playoff kualifikasaun Tasa Mundiál 2026 nian iha kuarta (01 Abríl 2026) liubá.
Jogadór Axel Tuanzebe sai hanesan erói vitória Kongo nian, marka golu iha minutu 100, bainhira Tuanzebe halo tiru ida ho distánsia besik hafoin halai tuir suta kantu ida. Enkuantu, Irake halakon Bolívia ho 2-1, Kualifika ba Tasa Mundiál 2026.
Ida-ne’e mak realizasaun istóriku ida ba futeból kongolés. Ida-ne’e mak dala uluk iha tinan 52 nia laran ne’ebé sira kualifika ba Tasa Mundiál.
Entretantu, Irake sai hanesan ekipa ikus ne’ebé asegura billete ba Tasa Mundiál 2026 hafoin halakon Bolívia ho 2-1 iha finál playoff interkontinentál.
Irake halakon impase iha minutu 10 no grasa ba golu ida husi Ali Al Hamadi, molok Moises Paniagua empata iha minutu 38. Eskoru mantein 1-1 iha intervalu.
Iha segunda parte, Irake marka tan golu liu husi Ayman Hussein iha minutu 53. Eskoru 2-1 mantein to’o jogu ramata.
Lakle’ur antes, ekipa europeia haat mós asegura ona sira nia fatin iha finál sira. Sira mak Suésia, Turkia, Repúblika Xeka, no Bósnia no Herzegovina.
Ekipa 48 ne’ebé Kualifikadu ba Tasa Mundiál 2026
Lista husi Ekipa 48 ne’ebé Kualifikadu ba Tasa Mundiál 2026 mak hanesan;
Uma-na’in: Kanadá, Méxiku, Estadu Unidu.
Europa: Inglaterra, Fransa, Kroásia, Portugál, Noruega, Áustria, Béljika, Alemaña, Olanda, Eskósia, España, Suisa, Suésia, Turkia, Repúblika Xeka, Bósnia no Herzegovina.
Ázia: Austrália, Iraun, Japaun, Jordánia, Korea Súl, Qatar, Arábia Saudita, Uzbekistaun.
Áfrika: Arjélia, Kabuverde, Kosta de Marfim, Ejiptu, Gana, Maroko, Senegal, Áfrika Súl, Tunízia.
Amérika Súl: Arjentina, Brazil, Kolómbia, Ekuadór, Paraguai, Uruguai.
Oseánia: Nova Zelándia.
Concacaf: Panama, Curacão, Haiti.
Husi ekipa 48 ne’ebé Kualifikadu ba Tasa Mundiál 2026 ne’e sei fahe ba grupu sira hanesan tuir mai;
Grupu A : Áfrika Súl, Korea Súl, Méxiku, Repúblika Xeka (Ceko)
Grupu B : Bósnia-Herzegovina, Kanadá, Qatar, Suisa
Grupu C : Brazil, Haiti, Maroko, Eskósia (Skotlandia)
Grupu D : Estadu Unidu (Amerika Serikat), Austrália, Paraguai, Turkia
Grupu E : Curacão, Ekuadó, Alemaña, Kosta de Marfim
Grupu F : Olanda, Japaun, Suésia, Tunisia
Grupu G : Béljika, Ejitu, Iraun, Nova Zelándia
Grupu H : España, Kabu Verde, Arábia Saudita, Uruguai
Grupu I : Fransa, Senegál, Irake, Noruega
Grupu J : Arjentina, Arjélia, Áustria, Jordánia
Grupu K : Portugál, Kongo, Uzbekistaun, Kolómbia
Grupu L : Inglaterra, Kroásia, Gana, Panamá
Jornalista : Hortêncio Sanchez
Editór : Cancio Ximenes
