DILI, 08 Abríl 2026 (TATOLI)—Ministru Justisa, Sérgio Hornai, hateten kaderneta pasaporte rihun 60 to’o Timor-Leste horiseik Ministru simu ona husi kompañia.
Nia subliña, akizisaun kaderneta pasaporte ne’e rasik hamutuk purvolta rihun-60.
“Ha’u husu ita hotu buka esforsu nafatin atu labele iha interrupsaun ba iha ita-nia atendimentu sira, pasaporte mai ona imi bele ba halo imi-nia pasaporte”, Sérgio Hornai hateten ba Tatoli iha Palásiu Governu hafoin partisipa reuniaun Konsellu Ministru.
Membru Governu ne’e rekoñese prosesu la’o kleur oituan tanba produsaun la’ós halo iha Timór maibé situasaun balun tenke dependénsia ba prodús iha rai-li’ur mak lori mai entaun han tempu uituan.
Tuir nia, produsaun pasaporte refere halo iha nasaun poládia ho montante hamutuk millaun $1.
Lembra katak iha loron 15 Janeiru 2026 Ministériu Justisa (MJ) liuhusi Diresaun Nasionál Servisu Rejistu Notariadu konklui prosesu akizisaun ba kaderneta pasaporte hamutuk rihun-75.
Diretór Nasionál Servisu Rejistu Notariadu, Agostino Gonçalves Viera, hateten, Governu tinan ne’e hakarak halo tan akizisaun ba kaderneta pasaporte, tanba ne’e prosesu hotu konklui ona nune’e hein empreza manda kaderneta mai.
Notísia relevante: https://tatoli.tl/2026/01/15/mj-konklui-ona-prosesu-akizisaun-ba-kaderneta-pasaporte-rihun-75/
Jornalista: Arminda Fonseca
Editór: Rafael Ximenes de A. Belo
