Klínika David Alex ‘Daitula’ rejista pasiente sofre moras ISPA 1.320

BAUKAU, 08 Abríl 2026 (TATOLI) – Klínika David Alex ‘Daitula’ durante trimestrál dahuluk tinan-ne’e rejista pasiente sofre moras Infeksaun Repiratóriu Aguda (ISPA) hamutuk 1.320.

Responsável Klínika David Alex ‘Daitula’, Elísio Siqueira Ximenes, esplika moras ISPA okupa iha númeru dahuluk hafoin pasiente halo tratamentu iha klínika referida, iha-ne’ebé maioria afeta ba Kombatente Libertasaun Nasionál husi munisípiu tolu hanesan Baukau, Lautém no Vikeke no munisípiu seluk.

“Durante ne’e sira mai mesak halo tratamentu, dala ruma ita mos ba hala’o tratamentu ba sira-nia kondisaun iha uma, ita mós halo promosaun saúde ba sira oinsá bele kuidadu sira-nia saúde,” Elísio Ximenes hateten iha ninia kna’ar fatin Ria-mare, Kuarta ne’e.

Elisio Ximenes, relata, pasiente ne’ebé sofre moras pulmaun krónika okupa iha numéru daruak ho totál na’in-1.059, enkuantu pasiente ne’ebé diagnóstika sofre moras tensaun hamutuk 456.

Alende ne’e, Klínika David Alex ‘Daitula’ durante inísiu tinan-ne’e halo ona atendimentu ba pasiente veteranu hamutuk 4.095 kompostu husi munisípiu Baukau 1.820 no husi munisípiu seluk 2.275.

“Sira-ne’e enfrenta moras tolu mak hanesan ISPA tanba klima, maibé moras pulmaun kronik no moras tensaun ne’e tanba sira idade ona,” Elísio Ximenes akresenta.

Responsável Klínika ne’e, salienta husi pasiente hirak-ne’e balun kondisaun hahú rekupera husi moras no kada fulan kontinua halo atendimentu rútina ba ne’ebé pasiente moras tensaun.

Entretantu, edtoke ai-moruk iha Klínika David Alex ‘Daitula’ atuál sufisiente atu fó atendimentu ba pasiente veteranu sira-ne’ebé kada loron hala’o tratamentu iha klínika referida.

Jornalista: Natalino Belo 

Editór: Evaristo Soares Martins