Mari Alkatiri destaka importánsia KKFP iha jestaun Fundu Petrolíferu
DILI, 08 Abríl 2026 (TATOLI)-Eis-Primeiru-Ministru, Mari Alkatiri, destaka importánsia Konsellu Konsultivu Fundu Petrolíferu (KKFP) iha jestaun Fundu Petrolíferu, tanba ne’e sujere hodi organiza di’ak liutan KKFP.
Deklarasaun ne’e fó sai iha audiénsia públika ho Komisaun D iha Parlamentu Nasionál ne’ebé Trata Asuntu Ekonomia no Dezenvolvimentu hodi rona opiniaun kona-ba projetu lei númeru 12/VI(3a) -Extingue KKFP no prosede alterasaun datoluk lei númeru 9/2005, loron 03 Agostu, kona-ba Fundu Petrolífeiru no alterasaun daruak Lei númeru 12/2017, loron 24 Maiu, Lei Organizasaun no Funsionamentu Administrasaun Parlamentár.
Tuir nia, lei ne’e tenke iha check and balance hodi kontinua hatudu imajen ba mundu kona-ba transparénsia ezekusaun iha Fundu Petrolíferu.
“Sira hakarak haree loloos Konsellu Konsultivu Fundu Petrolíferu iha Parlamentu ne’e, importante nafatin kala’e? check and balance ne’e, ida mak ne’e duni. Se Parlamentu lakoi fó importánsia ba ida ne’e, ha’u dehan abanbainrua lei ne’e ninia kredibilidade internasionál ne’e [sei] monu,” Mari Alkatiri hateten hafoin ramata audiénsia iha Faról, Dili, ohin.
Eis-Xefe Governu rekoñese katak durante ne’e iha implementasaun KKFP sei enfrenta difikuldade balun, tanba ne’e presiza buka atu mellora.
Lembra katak projetu lei ne’e ho objetivu atu halakon tiha KKFP ho razaun durante ne’e ninia funsionamentu la efetivu.
Lembra katak, KKFP nia papél mak atu halo avaliasaun periódika no fó pareser tékniku ba Parlamentu no Governu kona-ba Rendimentu Sustentavel Estimadu (RSE) no utilizasaun Fundu Petrolífeiru.
Notísiarelevante: Prezidente Parlamentu konkorda halakon KKFP
Jornalista: Nelson de Sousa
Editora: Isaura Lemos de Deus
