DILI, 08 Marsu 2026 (TATOLI) –Sekretáriu Estadu Komunikasaun Sosiál, Expedito Loro Dias Ximenes, kuarta ne’e, esklarese deklarasaun Primeiru-Ministru Xanana Gusmão nian kona-ba posibilidade hamate ahi husi tuku 23h00 to’o 05h00 dadersaan.
Nia esplika, deklarasaun Primeiru-Ministru nian ne’e la’ós aplika agora ka fulan ida-ne’e maibé ida-ne’e posibilidade bainhira to’o situasaun krize enerjia eletrika ne’ebé daudaun la’o hela iha mundu tanba funu iha médiu oriente.
“Atu esklarese katak atu taka ahi la’ós agora ka fulan ida-ne’e maibé iha krize situasaun ne’ebé obriga, karik, maka Governu iha tempu mai sei bele taka husi oras 23h00 to’o tuku 05h00 dadersaan”, Expedito Loro Dias Ximenes, hateten iha Palásiu Governu Dili.
Governante ne’e dehan, públiku labele intende sala kona-ba taka ahi ne’e tanba ida-ne’e hanesan posibilidade de’it, maibé daudaun Governu esforsu halo hela hanesan prevensaun ho rezolusaun ne’ebé Governu hasai katak atu bele iha rezerva kombustível serbisu hamutuk ho impotadór sira durante ne’e oinsá krize ne’e labele mosu iha nasaun ne’e.
“Entaun daudaun akizisaun la’o hela ita bele iha rezerva ba tempu naruk nian fulan neen, fulan ualu no bele to’o fulan ida, se karik funu ne’e naruk ita atravesa duni krize enerjiatika kombustivel iha ita-nia rai iha momentu ne’ebá mak sei hola desizaun taka ahi”, nia dehan.
Notísia relevante:Ahi Mate Lakan Impaktu Husi Manutensaun Sistema Distribuisaun Eletrisidade
Lembra katak iha loron 02 Abríl 2026 Primeiru-Ministru Xanana Gusmão hato’o deklarasaun ne’e bainhira hasoru malu ho Prezidente Repúblika, Ramos-Horta hodi relata serbisu Governu nian ba Xefe Estadu.
Iha deklarasaun Primeiru-ministru Xanana Gusmão hateten katak kona-ba funu Médiu Oriente Governu akompaña nafatin karik situasaun sai difisil osan millaun $80 ne’ebé Governu hasai sosa kombustível ne’e bele aguenta fulan neen hanesan ne’e.
“Maibé ha’u informa ona ba Prezidente Repúblika katak karik situasaun ne’e difisil sei aviza eletrisidade lakan to’o tuku 23h00 no loke fali iha tuku 05h00 dadersaan nune’e bele poupa”, nia dehan.
Jornalista: Arminda Fonseca
Editór: Rafael Ximenes de A. Belo
