DILI, 08 Abríl 2026 (TATOLI)-Prezidente Konsellu Diretivu Ajénsia TATOLI, Institutu Públikun(I.P), Noémio Falcão, akompaña husi Vise-Prezidente Asuntu Administrasaun no Finansa, Madalena Carlos, ho ekipa, kuarta ne’e, hala’o audiénsia ho Komisaun Funsaun Públika (KFP) hodi diskute kona-ba aplikasaun dekretu-lei foun númeru 3/2026, 3 Fevereiru, kona-ba rejime kontratu termu sertu iha administrasaun públika.
Iha enkontru ne’e, parte rua troka hanoin kona-ba impaktu husi aplikasaun dekretu-lei referidu ba funsionamentu no jestaun rekursu umanu iha TATOLI, I.P, liliu relasiona ho natureza serbisu jornalizmu no produsaun notísia ne’ebé iha karakteristika espesífika no dinámika rasik.
Konsidera katak TATOLI, I.P nu’udar mídia estatál ne’ebé presiza fleksibilidade iha jestaun rekursu umanu atu asegura kontinuidade kobertura informasaun no kumpre misaun públika hodi fó informasaun atualizada ba sosiedade.
Parte rua konkorda atu kontinua halo koordenasaun no komunikasaun di’ak atu garante katak aplikasaun lei ne’e la prejudika dezenvolvimentu sebisu jornalizmu no papel estratéjiku TATOLI, I.P iha sistema informasaun nasionál.
Lembra katak, Konsellu Ministru aprova ona iha fulan-Janeiru tinan ne’e, dekretu-Lei númeru 3/2026, loron 3 fulan Fevereiru, kona-ba Rejime
Jurídiku ba Kontratus Traballu ho Termu Sertu iha Administrasaun Públika. Diploma ida-ne’e ho objetivu prinsipál atu estabelese rejime jurídiku ida ne’ebé klaru, uniforme no transparente hodi selebra, jere no fiskaliza kontratus traballu ho termu sertu iha Administrasaun Públika, hodi garante utilizasaun ida ne’ebé responsavel ba rekursus umanus no finanseirus Estadu nian hodi hatán ba nesesidades temporárias servisus nian.
Rekorda mós katak to’o iha loron 07 Fulan-Abríl, KFP rejista liña ministeriál no instituisaun públiku hamutuk 94 ho númeru funsionáriu hamutuk rihun 19-resin mak halo ona reajustamentu tuir dekretu-lei foun, husi númeru ne’e 17.475 simu ona saláriu.
Notísia relevante: KFP: Instituisaun 94 halo ona reajustamentu salariál tuir rejime foun
Jornalista: Nelson de Sousa
Editora: Isaura Lemos de Deus
