OEKUSI, 08 Abríl 2026 (TATOLI) – Governu liuhusi Ministériu Administrasaun Estatál (MAE), nomeia Diretór Nasionál Apoia Administrasaun Suku (DENAAS), Celestinho Martinho Marques subsitui Prezidente Autoridade Rejiaun Administrativa Espesiál Oekusi Ambeno (RAEOA), nu’udar interinu, hodi hein Prezidente Régio Salu, recupera saúde.
Notísia relevante:Última hora: Governu nomeia Celestinho Marques subsitui PA RAEOA
Prezidente Autoridade RAEOA substituisaun, Celestinho Martinho Marques, informa, nomeasaun mai husi Ministériu Administrasaun Estatál (MAE) no hetan koñesimentu husi Primeiru-Ministru (PM), Kay Rala Xanana Gusmão, hanesan entidade tuteladu ba RAEOA.
“Ha’u simu despaixu husi Ministru Estatál. Despaixu ne’e ho númeru referénsia 21/MAE/IIII/2026/07/Abríl, ne’ebé nomeia ha’u atu mai asumi kna’ar hanesan Prezidente Autoridade RAEOA em substituisaun, ne’ebé sei mai mesak, hamutuk ho kargu xefia sira iha Oekusi, la’ós lori ema barak,” nia hateten perante enkontru ho diretór rejionál no xefe departementu sira iha salaun administrasaun Numbei Oekusi, ohin.
Atuál Diretór Nasionál Apoia Administrasaun Suku iha Ministériu Administrasaun Estatál (MAE) ne’e, esplika, razaun prinsipál husi subsituisaun ne’e, atu garántia funsionamentu administrasaun iha RAEOA, tanba Prezidente Autoridade RAEOA atuál, Régio da Cruz Salu, nia kondisaun saúde seidauk rekuperadu hodi kontinua serbisu.
“Bainhira nia (Régio da Cruz Salu) saúde rekupradu, ohin ka aban nia mai retoma hikas nia funsaun hanesan baibain nu’udar Prezidente Autoridade RAEOA, ha’u sei cesa permanente, maibé ha’u subtitusaun ne’e, iha kompetensia atu hala’o serbisu iha Oekusi,” nia afirma.
Entretantu, bainhira jornalista sira husu kona-ba despaixu karta nomeasaun ne’e, maibé rejeita atu fó sai ba mídia sira, maibé kopia entrega ona ba diretór sira iha diresaun idak-idak to’o jestór sub-rejiaun Oésilo, Pássabe, Nítibe no Pante Makasar.
“Karta ha’u labele fó ba mídia sira, maibé imi bele asesu iha Jornál Repúblika, ne’ebé ita sei hamutuk koopera malu, atu ita funsiona nafatin serbisu administrasaun públika iha Oekusi, serbisu hotu tenke la’o, labele paradu,” nia katak.
Iha biban ne’e, Diretór Jerál Rejiaun Oekusi, Domingos Punef, konsidera nomeasaun ne’e importante, nune’e bele garante funsionamentu administrasaun iha Oekusi.
“Nomeasaun ne’e nesesáriu duni, tanba Prezidente Autoridade RAEOA atuál to’o agora kondisaun saúde, ne’e mak husi nasionál foti desizaun ne’e atu mai, subsituisaun ne’e importante atu haree ba mákina Estadu labele para, tenki la’o hanesan baibain, no prosedimentu sira-ne’ebé maki ha diresaun sira tenki la’o tuir nesesidade bazeia lei,” nia hateten.
Jornalista: Abílio Elo Nini
Editór: Rafael Ximenes de A. Belo
