DILI, 09 Abríl 2026 (TATOLI)—Prezidente Repúblika, José Ramos-Horta, kinta ne’e, simu audiénsia husi Diretór Ezekutivu Empreza Aero Dili, Lourenço de Oliveira, hodi rona esplikasaun kona-ba situasaun aero Timor-Leste nian liga ho krize kombustível ne’ebé kauza husi funu Médiu Oriente entre Amérika ho nia aliadu Izraél hasoru Iraun.
“Nu’udar Empreza Aero, sei taka voo Aero Dili husi Timor-Leste ba Singapura inklui Dili ba Fuzhou (Xina), depois sei kontinua hafoin situasaun normal,” Diretór Aero Dili, Lourenço de Oliveira, hateten liuhusi nota ne’ebé Agência TATOLI asesu, ohin.
Lourenço esplika, voo balun sei diminui nia rute husi semana ida dala-rua ka tolu, sei diminui ba loron ida de’it iha semana ida-nia laran mak hanesan Malázia no Xina, maibé ba Indonézia ne’e sei haree mós ba situasaun krize kombustível.
Kona-ba billete, emprezáriu ne’e informa, folin sa’e ona tuir situasaun mundiál liuliu liga ho avtur nia folin ne’ebé sa’e ona ba 90% dezde Marsu 2026 no situasaun refere enfrenta iha mundu tomak, la’ós de’it iha Timor-Leste.
Husi problema ida-ne’e, Aero Dili sei la hamenus nia funsionáriu sira, kompara ho kompañia aero iha mundu ne’ebé hamenus daudaun ona sira-nia funsionáriu.
Parte Aero Dili aprezenta mós kona-ba pozisaun Governu atuál nian hodi ajuda Aero Dili hanesan empreza Timoroan nian hodi bele kontinua nia operasaun, nune’e Empreza Aero Dili iha planu atu Governu mós hola parte iha asaun (saham) iha empreza Aero Dili hodi fortifika nia ezisténsia.
TATOLI
