BAUKAU, 09 Abríl 2026 (TATOLI) – Prezidente Konsellu Munisipál Kombatente Libertasaun Nasionál (CMCLN, sigla portugés) Baukau, Cornelio Gama ‘L7’ enkoraja veteranu-sira atu kontinua tau atensaun ba kondisaun saúde pesoál.
Eis komandante Rejiaun II ne’e husu veteranu atu hakbesik aan ba fasilidade saúde hanesan Klínika David Alex ‘Daitula’ bainhira enfrenta kondisaun saúde ladún di’ak.
Komandante FALINTIL Cornelio Gama “L7” rekoñese, veteranus nu’udar patrimóniu estadu durante tinan naruk sakrifika aan liu hasoru inimigu no preokupa ho veteranu sira-nia saúde, tanba barak mak durante ne’e menus halo tratamentu saúde iha fasilidade saude ne’ebé Estadu Timor-Leste estabelese.
“Veteranu kuandu moras, família tenke komunika kedas ba ospitál atu karreta ambulánsia ba tula hodi halo tratamentu, tanba sira terus ba nasaun ne’e. Ita tenke respeita sira-nia sakrifísiu,” Prezidente CMCLN Baukau, Cornelio Gama “L7” hateten iha nia knaar fatin Vila Antiga, Kinta ne’e.
CMCLN Baukau seidauk rekolla dadus óbitu iha nível munisípiu, enkuantu husi Postu Laga rejista veteranus na’in-510 mak lakon vida ne’ebé hafoin ukun-aan tanba kauza balun falta kontrola saúde.
“Sé kura iha-ne’e labele, CMCLN tenke asina surat ba nasionál atu haruka ba tratamentu iha rai-li’ur,” L7 akresenta.
Entretantu, tuir dadus iha Klínika David Alex ‘Daitula’ durante inísiu tinan-ne’e halo ona atendimentu ba veteranu hamutuk 4.095 kompostu husi munisípiu Baukau 1.820 no husi munisipiu seluk hamutuk 2.275.
Jornalista: Natalino Belo
Editór: Evaristo Soares Martins
