BAUKAU, 09 Abríl 2026 (TATOLI) – Serbisu Munisipál Diresaun Nasionál Transporte Terrestre (DNTT) Baukau deside kontinua mantein tarefa Transporte Publiku iha área urbana.
Tuir nota imprensa ne’ebé Ajénsia TATOLI asesa iha kinta ne’e, desizaun referida bazeia ba despaxu ministeriál númeru 013/2012, loron 13 juñu kona-ba tarifa sirkulasaun transporte públiku iha área urbana.
“Ita sedauk iha mudansa ba tarifa transporte públiku,” Hakerek nota imprensa ne’e.
DNTT Baukau mos rejeita informasaun ne’ebé espalla iha rede sosiál katak tarifa foun transporte públiku iha urbana Baukau Vila hanesan mikrolete A1 no A2 ne’ebe ba estudante husi sentavu 0,15 ba sentavu 0,25 no pasajeiru bainbain husi sentavu 0,25 sa’e ba sentavu 0,50 no konsidera informasaun referida laloos.
Tuir tarifa anteriór ne’ebé mensiona tuir tabela hanesan mikrolete marka A1 diresaun terminál, merkadu foun, Vila Antiga no Uainiki Ba-Mai (BM) no Mikrolete marka A2 diresaun terminál, Vila Antiga Ria-mare nafatin mantein ho tarifa anteriór hanesan ba estudante sentavu 0,15 no pasajeiru babain sentavu 0,25.
“Ita nafatin mantein tarifa anteriór ne’ebé mak ami publika,” nota imprensa ne’e hateten.
Entretantu, Tuir observasaun Ajénsia TATOLI iha terenu nota katak ohin transporte públiku mikrolete marka A1 no A2 kontinua hala’o atividade bainbain maske iha loron-kuarta, 08 Abríl motorista halo asaun pasífika no ezize DNTT Baukau hasa’e tarifa transporte relasiona ho rendimentu inpaktu husi folin kombustível.
Notísia relevante: Motorista Baukau husu DNTT hasa’e folin transporte publiku
Jornalista: Natalino Belo
Editór: Evaristo Soares Martins
