PR-Komisaun D diskute kona-ba futuru Konsellu Konsultivu Fundu Petrolíferu
DILI, 09 Abríl 2026 (TATOLI)—Prezidente Repúblika, José Ramos-Horta, ohin, simu Vise-Prezidente Komisaun D Parlamentu Nasionál, Manuel Henrique Noronha, ho delegasaun iha Palásiu Prezidensiál Nicolau Lobato, Bairru Pite, hodi diskute kona-ba futuru Konsellu Konsultivu Fundu Petrolíferu nian.
Enkontru ne’e foka liuliu ba proposta terseira alterasaun ba Lei Nú. 2/2017 kona-ba Organizasaun no Funsionamentu Administrasaun Parlamentár. Audiénsia ne’e parte ida husi prosesu konsultasaun ne’ebé luan hosi Komisaun atu hetan hanoin hosi lideransa Estadu atuál no pasadu sira kona-ba reforma lejizlativa ne’ebé fó impaktu ba órgaun fiskalizasaun nasionál sira.
Tópiku sentrál husi diskusaun ne’e mak kona-ba futuru Konsellu Konsultivu Fundu Petrolíferu nian, ne’ebé la ativu ona iha tinan hirak ikus ne’e. Maske Komisaun ne’e foti hela opsaun sira atu halakon ka halo reforma ba órgaun ne’e, Prezidente Ramos-Horta defende atu mantein Konsellu ne’e liuhusi mudansa estratéjika iha nia kompozisaun.
Prezidente sujere, Konsellu ne’e tenke revitaliza liuhusi rekrutamentu ba espesialista tékniku sira-ne’ebé kualifikadu tebes no iha esperiénsia barak. Espesialista sira-ne’e sei halo koordenasaun ho eis-titulár sira atu nune’e bele fó apoiu ne’ebé forte no la-polítiku, hodi asegura jestaun efetivu ba riku-soin petrolíferu nasaun nian.
Vise-Prezidente Komisaun D Parlamentu Nasionál, Manuel Henrique Noronha, hateten Prezidente nia hanoin sira-ne’e la’o hamutuk ho nesesidade atu iha mekanizmu fiskalizasaun ne’ebé funsionál liután no bazeia ba matenek espesialista sira-nian.
Prezidente enfatiza katak maske desizaun lejizlativa finál iha Parlamentu Nasionál nia liman, reforma naran de’it tenke asegura katak Konsellu ne’e livre husi interferénsia polítika.
Enkontru ne’e hala’o hafoin konsultasaun ho líder pasadu sira hanesan Mari Alkatiri no Taur Matan Ruak, no Komisaun D planeia ona atu kontinua sira-nia diálogu ho atuál Primeiru-Ministru, Xanana Gusmão no eis-Prezidente, Francisco Guterres Lú-Olo atu alkansa konsensu nasionál ida kona-ba kestaun ne’e.
TATOLI
