DILI, 09 Abríl 2026 (TATOLI)–Primeiru-Ministru, Kay Rala Xanana Gusmão, kinta ne’e, hasoru malu ho Prezidente Repúblika José Ramos-Horta hodi aprezenta kona-ba Governu halo ona aprovasaun ba arkitetóniku ba Dili International Convention Center ka Sentru Konvensaun Internasionál Dili ne’ebé sei konstrui iha antigu Portu Dili.
“Ha’u informa ba Prezidente katak, Governu liuhusi Konsellu Ministru aprokva rezolusaun ida-ne’ebé aprezenta husi Vise-Primeiru-Ministru, Francisco Kalbuadi Lay, hamutuk dezeñu kuaze ualu (8) atu nune’e, Konsellu Ministru atu hili, iha ne’ebá modelu oioin tuir ita-nia kultura sira. Maibé, Konsellu Ministru hili ho unanimidade ba dezeñu ida-nia leten hanesan ondas ne’e,” Xanana hateten ba jornalista sira hafoin ramata enkontru ho Xefe Estadu iha Palásiu Prezidensiál Nicolau Lobato, Bairru Pite, ohin.
Nia dehan, husi dezeñu ualu (8) ne’ebé iha, Governu hili de’it modelu ondas tanba Timor-Leste nia lema ida mak ‘Ha’u-nia tasi, ha’u-nia Timor’.
“Ita hili dezeñu nia modelu ondas ne’e tanba ita ne’e illa ida, tasi mak haleu ita, no ita baibain dehan ‘ha’u nia tasi, ha’u nia timor’. Ne’ebé, aprova ona, fatin atu halo Sentru Konvensaun foun ne’e, ha’u ho Primeiru-Ministru Malázia Anwar Ibrahim halo ona lansamentu,” nia hateten.
Nia hatutan, arkitetóniku ba Sentru Konvensaun Inernasionál Dili foun ne’e, projetu estruturante ida-ne’e ho objetivu atu sai uma-na’in ba reuniaun sira ASEAN nian durante Timor-Leste nia prezidénsia iha tinan 2029, inklui simeira Xefe Estadu no Xefe Governu sira-nian no mós eventu ho dimensaun boot sira seluk.
Sentru konvensaun foun sei harii iha área portu tuan, iha Baía Dili nia sorin, no sei inklui edifísiu prinsipál ida ho sala konferénsia, auditóriu no pavillaun sira ba espozisaun, no mós área komplementár sira lazer no turizmu nian, inklui paseiu ida hodi la’o iha ponte kais nia sorin, akuáriu ida no sentru entretenimentu no komérsiu ida.
Kona-ba obra ne’e, Vise-Primeiru-Ministru Francisco Kalbuadi Lay daudaun ne’e koordena hela ho Ministériu Finansa (MF) no empreza ne’ebé atu halo obra ne’e, atu haree kustu atu selu oinsá no preparasaun hotu durante fulan ida (1).
“Ita hatene katak, 20 Maiu agora tinan 24 ita ukun-aan, halo ona lansamentu fatuk dahuluk atu nune’e sira bele halo servisu no empreza rasik promete antes 20 de Maiu 2028 obra ne’e entrega ona ba Governu. Dezeiñu lubuk ida-ne’ebé kapas loos, iha akuáriu ne’ebé tama to’o tasi ne’ebá atu ema hotu ba haree sent, oinsá muda tia karáter ida soe lixu arbiru ba tasi ne’e no buat barak tan,” nia dehan.
Jornalista : Hortencio Sanchez
Editór : Cancio Ximenes
