DILI, 10 Abríl 2026 (TATOLI)—Primeiru-Ministru, Kay Rala Xanana Gusmão, realiza enkontru ho atuál Komandante Jerál Polísia Nasionál Timor-Leste, Afonso dos Santos no Segunda Komandante PNTL, Natércia Martins, hodi diskute kona-ba sira-nia misaun hodi garante servisu seguransa interna.
“X Xefe Governu fó mensajen no orientasaun atu asegura situasaun iha teritóriu timor laran tomak hodi garante estabilidade no hakmatek ba ema hotu-hotu, hahú husi kapitál nasaun nian to’o área rural,” Segunda Komandante Jerál Komisária Asistente, Natércia Eufrásia Soares Martins hateten ba jornalista sira iha Palásiu Governu, ohin.
Nia hatutan, ida-ne’e hanesan kompeténsia nu’udar komandante jerál PNTL ho segunda komandante Jerál PNTL ne’ebé nomeia husi Governu Konstitusionál da-sia (IX) no simu pose iha loron 27 fulan-Marsu tinan 2026, mai hato’o sira-nia kompromisu konfiansa ne’ebé Governu depozita ba sira.
“Ami halo ami-nia servisu ho efetivu durante semana rua ona, entaun ami hasoru Primeiru-Ministru atu komprimenta feliz Páskua nian no hato’o ami-nia kompromisu konfiansa ne’ebé depozita mai ami liuhusi Xefe Governu nia orientasaun sira-ne’ebé ami hetan durante iha serimónia pose. Tanba ne’e, ami sei responsabiliza iha ami-nia misaun tuir mandatu ne’ebé sira simu,” Segunda-komandante PNTL, afirma ba jornalista sira iha Palásiu Governu, ohin.
Nia hatutan, orientasaun ne’ebé PM Xanana fó ba sira ho klaru, entaun sira-nia kompeténsia ne’ebé regula iha sira-nia lei orgánika.
“Entaun ho kompeténsia ne’ebé iha nu’udar orgaun soberanu no Xefe Governu sempre iha papel tomak atu orienta ami, atu ami mós kumpre tuir kompeténsia sira-ne’ebé lei fó mai mak iha lei orgánika PNTL nian,” nia hateten.
Jornalista : Alexandra da Costa
Editór : Cancio Ximenes
