DILI, 10 Abríl 2026 (TATOLI)–Tribunál Judisiál Primeira Instánsia Dili (TJPID), liuhusi Juíz Turnu, Marculino dos Santos, Sesta ne’e, hasai ona despaixu hodi aplika medida koasaun Prizaun Preventiva arguidu FXC ne’ebé sona ema nai’in-haat iha área Beto, ne’ebé rezulta labarik ho idade tinan-hitu mate no na’in-tolu seluk ho kanek grave, iha Segunda (06/04).
Defeza husi arguidu FXC, Defensór Públiku José da Silva, hateten, Tribunál nia despaixu deside hodi aplika medida koasaun Prizaun Preventiva hodi hein prosesu investigasaun.
“Defeza aseita despaixu husi Tribunál no ha’u mós sei halo rekursu. Ita mós sei haree motivu sira ne’e tanba iha ema na’in-tolu mak kanek no na’in-ida mak mate,” José hato’o ba Jornalista sira iha TJPID, Kaikoli.
Notísia relevante : MP promove krime tolu ba arguidu FXC ne’ebé sona ema na’in-haat iha Beto
Nia esplika, ho despaixu husi Tribunál ne’e, arguidu bele tama iha Prizaun Preventiva atu nune’e Ministériu Públiku (MP) sei halo investigasaun husi parte família atubele hatene kauza loloos husi FXC nia moras, tanba tuir relatóriu médiku nia kondisaun normál.
“Ministériu Públiku mós sei ba entrevista nia família sira, iha momentu nia sona ne’e mak moras, bele konsidera dehan nia moras kesurupan tuir loron de’it, ho prosesu sira ne’e.
“Ministériu Públiku sei ba entrevista família nune’e bele deside arguidu tama Prizaun Preventiva ka ba medida internamentu, maibé agora daudaun ba Prizaun Preventiva,” nia katak.
Interogatóriu dahuluk ne’e Prezide husi Juíz turnu, Marculino dos Santos, MP reprezenta husi Prokuradór, Luís Hernani Rangel, arguidu hetan asisténsia legál husi Defensór Públiku, José da Silva.
Jornalista : Natalino Costa
Editora : Julia Chatarina
