KOVALIMA , 10 Abril 2026 (TATOLI) – Polísia Nasionál Timor-Leste (PNTL), Munisípiu Kovalima, liuhosi Unidade Tránzitu iha trismetre dahuluk (Janeiru to’o Marsu) 2026 rekolla ona osan hamutuk $ 2.500 ba kofre Estadu hosi atividade pasa revista ba transporte privada no públiku ne’ebé komete infrasaun.
“Polísia liuhosi sesaun tránzitu hala’o atividade pasa revista ka auto-stop la’os foku de’it iha ba loron bo’ot Paskua no loron bo’ot sira seluk, maibé ita halo operasaun auto-stop hodi kontrola movimentu trázitu rodaviáriu ita hala’o ho rutina,” Komandante PNTL Munisípiu Kovalima, Superintendente Asistente, Polísia Inacio Amaral relata ba jornalista sira iha Komandu PNTL Kovalima Santa Rosa ohin.
Nia dehan, bainhira PNTL Komandu Munisípiu Kovalima halo pasa revista deskobre katak motorista barak laiha karta kondusaun no mós dokumentu transporte mate, aplika koima ba infratór sira hodi selu osan ba kofre Estadu.
“ Ita rekolla reseita $ 2500 liuhosi atividade pasa revista iha tereñu tanba foin lalais ne’e hala’o atividade signifikativu ida fó benefisiu ba ita-nia sidadaun hanesan halo teste ba iha karta kondusaun tanba sidadaun rihun- resin mak tuir teste,”tenik tan.
Tuir nia hosi atividade auto-stop ka pasa revista ne’e hodi tulun PNTL atuhalo prevensaun ba asidente trafégu ne’ebé rezulta ema mate no kanek iha munisípiu Kovalima.
Entertantu, tuir dadus husi Diresaun Transporte no Komunikasaun Munisípiu Kovalima ninian, rejista iha fulan kotuk motorista 2-resin maka tuir teste hodi hetan karta kondusaun nune’e bainhira kondúz karreta no motor tenke iha karta kondusan.
Jornalista: Celestina Teles
Editór:Florencio Miranda Ximenes
