VIKEKE, 11 Abríl 2026 (TATOLI)—Eskavatór husi Ministériu Agrikultura, Peska, Pekuária no Floresta (MAPPF) destakadu iha Postu Administrativu Uatulari, Munisípiu Vikeke hodi normaliza irrigasaun, daudaun ne’e ho kondisaun a’at, nune’e labele halo operasaun.
“Ekipamentu eskavatór hodi normaliza irrigasaun sira iha Postu Uatulari ne’e pompa suit óleu idrolik mak a’at, ne’ebé ita labele halo operasaun hodi normaliza irrigasaun sira. Pompa ne’e ami buka iha Timor la hetan, entaun husi nasionál sosa ona iha Indonézia maibé seidauk to’o iha. Tanba ne’e, mak tékniku sira husi MAPPF seidauk mai halo manutensaun,” Responsável Eskavatór iha Postu Uatulari, Vicente Rui Soares da Cruz, informa ba Ajénsia TATOLI, iha nia knaar fatin, Sábadu ne’e.
Nia dehan, tempu agora hodi halo natar, nune’e irrigasaun iha fatin hitu mak presiza normaliza hodi fornese bee ba natar sira, maibé agrikultór hasoru dikuldade hanesan eskavatór avaria.
“Tanba ne’e, agrikultór sira preokupa tebes tanba eskavatór avaria. Nune’e ami hein hela materiál seidauk mai. Ami mós kontinua koordena ho parte nasionál para aselera manutensaun hodi agrikultór sira bele halai natar ba époka ne’e,” nia akresenta.
Notísia relevante : Irrigasaun Bebui Uatulari nakonu ho sedimentasaun afeta ba natar ektare 1.000
Tuir Responsável ekipamentu, bainhira manutesaun tarde sei fó impaktu boot ba irrigasaun tolu hanesan irrigasaun Asafasi, Betubo’o no Laliu iha Uatulari ho totál natar ektare 242-resin.
Iha tinan kotuk, ekipa téknika ho ekipamentu pezadu konsege normaliza natar parte Buitau Xafatula, nune’e natar ektare 50 mak funsiona ona, enkuantu ektare 20 mak seidauk asesu bee.
“Manutensaun tenke lalais atu normaliza irrigasaun sira, atu agrikultór sira bele halo natar, se lae natar sira abandona filafali,” nia katak.
Responsável ne’e reforsa, karik ekipamentu ba manutesaun eskavatór mai tarde, maka MAPPF presiza buka altenativu seluk, hanesan lori fali eskavatór husi munisípiu seluk hodi mai apoiu normaliza irrigasaun sira.
Natar sira ne’ebé la funsiona iha Suku Makadike, Uaitame, Makadike de Cima, Makadike de Baixo no Matahoi.
Jornalista : Vitorino Lopes da Costa
Editora : Julia Chatarina
