VIKEKE, 11 Abríl 2026 (TATOLI) – Ministériu Agrikuktura, Peska, Pekuária no Floresta (MAPPF), tinan ne’e, fornese fini hare hamutuk tonelada sia (9) ba natar na’in postu administrativu Uatulari, munisípiu Vikeke hodi hasa’e produsaun ai-han.
Koordenadór Estensionista postu administrativu Uatulari, Francisco Belo hateten fini hirak ne’e distribui ona ba komunidade natar na’in husi suku ualu iha Uatulari.
Distribuisaun fina hare sira ne’e mak hanesan, tonelada rua (2) ba suku Afaloikai, tonelada ida (1) ba suku Babulu, tonelada ida (1) ba suku Uatiame, tonelada ida (1) ba suku Matahoi, tonelada ida (1) ba suku Makadike de Baixu, tonelada ida (1) ba suku Makadike Uaitame, tonelada ida (1) ba suku Makadike de Cima no tonelada ida (1) ba suku Vessoru.
Nia dehan hafoin distribuisaun, fini sira-ne’e autoridade suku mak sei fahe ba agrikultór sira.
Enkuantu, nia relata katak dadauk ne’e irrigasaun Bebui no Belia mak sei nafatin fornese bee ba natar. “Natar ne’ebé agrikultór sira halo ona ne’e tanba hetan husi irrigasaun Bebui no Belia,” Belo akresenta.
“Maibe nia hateten kondisaun irrigasaun Bebui mak daudauk ne’e iha problema oituan tanba sedimentasaun nakonu iha kanal. Hodi nune’e, distribuisaun bee ba natar la’o ladun di’ak,” dehan Belo.
Nia parte hato’o ona kestaun ne’e ba nasionál hodi halo normalizasaun ba sedimentasaun iha tempu badak atu labele prejudika prosesu kultivu natar iha epoka 2026.
“Se ita lahasai sedimentasaun hirak ne’e mak sei difikulta prosesu kuda hare. Se karik normalizasaun tarde, ida-ne’e sei prejudika tebes distribuisaun bee ba natar”, nia hato’o.
Maske nune’e, nia dehan maioria komunidade mak halai ona natar no “balun komesa halo ona viveiru no balun kuda ona hare oan.”
Jornalista: Vitorino Lopes da Costa
Editór: Filomeno Martins
